Rama refuzoi dialog ‘në anglisht’, a po ndërmjetëson Yuri Kim një marrëveshje të re PS-PD për ndryshimet kushtetuese

Ambasadorja amerikane Yuri Kim zhvilloi paradite një takim me kreun e grupit parlamentar socialist Taulant Ballën dhe atë demokrat, Alfred Rushajn.

Takimi u zhvillua në Kryesinë e Kuvendit përpara mbajtjes së mbledhjes së Këshillit të Legjislacionit, ku u diskutua nisma e propozuar nga PD për ndryshimet kushtetuese dhe nisma e PS për zgjatjen e afateve të vettingut, por që sërish u bënë objekt përplasjeje mes palëve.

Anëtarët e opozitës braktisen mbledhjen e përbashkët të Komisionit të Ligjeve dhe Këshillit të Legjislacionit pas debatit. 

Pas takimit mes tyre, Kim zbardhi ç’diskutoi me dy zyrtarët e lartë të PS dhe PD, në lidhje me prioritetet e tyre legjislative.

“Faleminderit krerëve të grupeve parlamentare Taulant Balla dhe Alfred Rushaj për takimin e sotëm ku ndamë pikëpamjet mbi prioritetet e tyre legjislative. Është e rëndësishme që palët të trajtojnë njëra-tjetrën me respekt të ndërsjellë, të flasin sinqerisht për dallimet, të ngrihen mbi paragjykimet kur është e mundur”, shkroi Kim në rrjetet sociale, ndërsa postoi edhe një foto me dy krerët e grupeve parlamentare.

Ambasadorja amerikane Yuri Kim duket se ka marrë rol ndërmjetësues , pasi çështja që ka nxitur këtë takim është zgjatja e mandatit të komisioneve të Vettingut.

Më herët Kim ka deklaruar se Kuvendi duhet të votojë pro zgjatjes së afateve.  Një javë më parë, në një takim me ambasadorin e OSBE, Vincenzo Del Monaco,  ambasadorja ka deklaruar se Parlamenti duhet të kalojë reformën kushtetuese për të zgjatur mandatin e vettingut. 

“Parlamenti duhet të kalojë reformën kushtetuese për të zgjatur mandatin e vettingut. Gjithashtu pajtohemi që autoritetet dhe palët duhet të veprojnë sipas rekomandimeve të OSBE për zgjedhjet”, shkruante Kim.

Nuk dihet nëse ky takim me ambasadoren Kim do të ndryshojë qëndrimin e demokratëve që s’kanë dhënë ende asnjë garanci se do të votojnë ndryshimin e një neni të vetëm në Kushtetutë.

Mes PS dhe PD ka mosdakordësi për vettingun në drejtësi, shtyrjen e afateve të organeve të KPK-së e KPA-së, ndërsa sociliastët kanë dalë hapur kundër nismës së PD për vettingun e politikanëve.

PS kërkon që të veçojë zgjatjen e afateve të komisioneve të Vetingut, nga reforma territoriale apo ajo zgjedhore dhe vetingu i politikanëve që janë kushte të demokratëve.

PD nga ana e saj kërkon që në Kushtetutë të ndërhyrhet vetëm një herë, dhe me konsensus mes palëve. Zgjatja e afateve të Vetingut të gjyqtarëve dhe prokurorëve kanë marrë dakordësinë e SHBA-së, dhe nuk dihet nëse ambasadorja do të bëjë presion mbi opozitën, që të trajtojë me prioritet këtë çështje.

Kujtojmë gjithashtu se kryeministri Rama ka deklaruar më herët duke komentuar propozimet e PD për ndryshimet kushtetuese  sa të jetë në krye të qeverisë nuk do të ketë dialog me opozitën më dialog me opozitën në praninë e të huajve.