Regjistrimi i PD në zgjedhje, çfarë fshihet pas afatit 48-orësh nga KQZ ndaj palës së Alibeajt

Komisioni Qendror i Zgjedhjeve i la 48 orë kohë për plotësimin e dokumentacionit përfaqësuesit të drejtuesit të deleguar të Partisë Demokratike, Enkelejd Alibeaj, për t’u regjistruar në zgjedhjet vendore të 14 majit nën emrin e subjektit Partia Demokratike.

Kreu i KQZ, Ilirjan Celibashi i la këtë afat për të saktësuar çështjen e Autorizimit, pasi sipas dokumenteve të gjykatës, rezulton se kryetar i PD-së është ende Lulzim Basha, ndonëse ky i fundit dha dorëheqjen një vit më parë.

Sipas tij, kërkesa e paraqitur nga Alibeaj bazohet në ligjin për partitë politike dhe në regjistrimet e gjykatës së Tiranës, ku sipas ligjit partia përfaqësohet nga kryetari i saj. Ai sqaroi më tej se deklarata solemne duhet të nënshkruhen nga kryetari i partisë, pra Lulzim Basha në këtë rast dhe jo nga drejtuesi i deleguar, Enkelejd Alibeaj.

Kjo kërkesë e KQZ ngre automatikisht pyetjen nëse Lulzim Basha ‘heq dorë’ nga dorëheqja e tij, për t’u rikthyer si kryetar i PD?

Në dosjen e dokumentacionit të kësaj force politike përfshihet edhe një “deklaratë e angazhimit solemn e kryetarit të partisë politike’, që rezulton të jetë firmosur nga Enkelejd Alibeajt.

 

Gjasat janë që grupimi i Bashës të shkojë sërish me të njëjtin dokument të firmosur nga Alibeaj me pretendimin se Basha ka dhënë dorëheqjen dhe më pas do të jetë në dorë të Celibashit nëse do ta pranojë apo jo argumentin e tyre.

Ish-kreu i KQZ-së, Kristaq Kume tha sot në Neës24 se ligji parashikon se ‘nëse nuk do të depozitohet kjo deklaratë e firmosur nga Basha, vendimi i KQZ-së do të jetë që të mos regjistrojë në zgjedhje PD-së”.

“Nuk e di se çfarë do të bëjë Basha, por di të them që është kërkesë e ligjit që kuptohet: Nëse nuk do të depozitohet kjo deklaratë e firmosur nga Basha, vendimi i Celibashi do të jetë që të mos regjistrojë në zgjedhje PD. Këto duhen bërë brenda këtyre 5-6 ditëve”, tha Kume.

Nga ana tjetër, deputeti Gazment Bardhi konfirmoi në një reagim në Tëitter se dokumentacionin është i plotë dhe se nuk do të çojnë asnjë shtesë, pavarësisht kërkesës së KQZ.

“PD ka dorëzuar dokumentacionin e plotë ligjor për regjistrim. Deklaratat e sotme politike të KQZ nuk kanë asnjë lidhje me ligjin, por janë formalizim i një vullneti politik ekstraligjor. Nuk do të ketë asnjë plotësim dokumentacioni sa kohë ai është dorëzuar i plotë!”, shkroi ai.

Basha ia ka deleguar funksionet drejtuese të partisë kryetarit të grupit parlamentar Enkelejd Alibeaj, ndërsa të dy palët kanë zhvilluar kongrese për të zotëruar përfaqësimin e partisë, dokumente të cilat tani janë ende në gjykatë. 

Kujtojmë se pak ditë më parë Apeli ktheu për rigjykim në shkallën e parë çështjen e përfaqësimit të Partisë Demokratike, duke rrëzuar vendimin e mëparshëm, që njihte ish kryeministrin Berisha si kryetar të kësaj partie.