Rritja e beftë e çmimeve, si ndryshuan deklaratat e Ramës para dhe pas revoltës së qytetarëve në mbarë vendin

Vendi ynë po përballet me një rritje të shfrenuar të çmimit të karburanteve, e për rrjedhojë edhe të shërbimeve dhe produkteve të shportës.

Ditë pas dite çmimet po pësojnë ndryshime, por ndërkohë sot shënohet dita e tretë që qytetarët në mbarë vendin kanë ndërmarrë një valë protestash, duke i kërkuar qeverisë të ndërhyjë për normalizimin e situatës.

Ky ‘zgjim’ i qytetarëve erdhi pas deklaratave të kryeministrit Edi Rama si para mediave, ashtu edhe në rrjetet sociale, kur deklaronte se qeveria nuk e ka të mundur kontrollin e çmimeve në bizneset private, apo se në këtë situatë kanë ndikuar edhe sanksionet që janë marrë nga Perëndimi kundrejt Rusisë, pas luftës në Ukrainë.

 “Po bëhet luftë, luftë prej vërteti, luftë me bomba e me viktima e me plagë te jashtëzakonshme, kjo po ndodh dhe po të ishte i mundur kontrolli i çmimeve nga qeveria, do e kishte ndonjë qeveri në Europë ku çmimet po rriten edhe më frikshëm se këtu, ndërkohë që këtu nuk po rritet ende energjia elektrike, pikërisht sepse shteti që e shet dhe e blen energjinë, ndryshe nga nafta e mielli e tërë të tjerat që shiten e blihen nga privatet, po e mban me dhëmbë kur i thonë llafit pikërisht që të lehtësojë sadopak familjarët!

Që s'është e drejtë kjo nuk diskutohet, po s'ka si të mos ndodhë në këto kushte alarmi në të gjitha tregjet dhe me sanksionet ndaj Rusisë që është eksportuesi më i madh në Europë i gazit, naftës dhe grurit, por ama nga ana tjetër s'ka se si të mos e marrim edhe ne bashkë me tërë të tjerët, një pjesë të barrës së luftës së ukrainasve kundër një agresioni ushtarak mbi shtetin e tyre sovran e demokratik, sepse historia na ka mësuar më shumë se një herë që kush mbyll sytë kur i vjen tjetrit lufta në shtëpinë e vet, shumë shpejt e ka luftën në shtëpinë e tij”,  i përgjigjej Rama një komentuesi në 5 mars.

Qytetarët të revoltuar deklaronin në protestat e mbajtura se Shqipëria është i vetmi vend që nuk kishte marrë masa për mbrojtjen e konsumatorëve, krahasuar me vendet e rajonit dhe se me çmimet e ‘çmendura’ në vetëm pak ditë, kostoja e jetesës për ta ishte në kufijtë e mbijetesës.

Në shenjë revolte, protestuesit bllokuan rrugët, jo vetëm në Tiranë, por edhe akset nacionale, por asnjë prej shoferëve nuk kundërshtoi, teksa zgjodhën të fiknin makinat dhe të protestojnë bashkë me ta.

Teksa paralajmëruan se protestat do të vijonin për ditë më radhë dhe numri i tyre sa vinte e shtohej, kryeministri njoftoi mbrëmë në Facebook, në kohën kur poshtë zyrës së tij protestohej, se qeveria brenda 48 orësh do të dilte me një plan masash konkrete për përballimin e situatës së krijuar prej rritjes së çmimeve. Madje, duke u ndalur te karburantet, Rama njoftoi se do të ngrihej edhe një bord kombëtar për kontrollin e çmimit të naftës.

Po sot në mëngjes, kryeministri, ndryshe nga disa ditë më parë kur nuk kishin nisur ende protestat, tha se shteti në bashkëpunim me furnizuesit e naftës do të përcaktojmë çmimin e karburanteve.

“Në këto kushte do të kalojmë brenda 24 orësh një akt normativ dhe qeveria do të hyjë në administrim e furnizimit bashkë me ju përmes një bordi kombëtar të furnizimit me karburant. Çdo ditë ju dhe qeveria, ministrja e Financave, ministrja e Infrastrukturës dhe energjisë, drejtori i Tatimeve dhe Doganave dhe kryetari i Autoritetit të Konkurrencës do të jetë me 5 përfaqësues nga ju, që do i zgjidhni vetë”, tha ai gjatë takimit me furnizuesit e naftës.

“Nuk do të ketë asnjë tabelë në asnjë pikë karburanti ku do të shfaqet një çmim që nuk është miratuar nga bordi. Nëse dikush do ta bëjë këtë do humbasë pikën e karburantit”, u shpreh më tej kryeministri.

Po ashtu, sipas tij brenda 24 orëve do të ketë një akt normativ për administrimin e furnizimit me karburant.

Kujtojmë se vetëm disa orë pas protestës së parë, për shkak edhe të rënies në bursën ndërkombëtare, pati një rënie të çmimit të karburanteve, po ashtu ulja vijoi edhe sot.

Aktualisht, çmimi i naftës nga 290 lekë/l që shënoi tri ditë më parë, aktualisht në shumicën e pikave shitet me 225 lekë/litër.