Shteti i ndërtimeve pa leje kërkon fajtor… përveç vetes! Rama bën "kokë turku" policinë bashkiake

Masa drastike, “listë e zezë” dhe paralajmërime të forta lëshoi sot kryeministri Rama nga takimi me deputetët e zgjedhur të Tiranës dhe drejtorët e bashkisë në kryeqytet, teksa foli për procesin e legalizimit dhe ndërtimet.

Rama i quajti “bashkëfajtorë” të gjithë ata që nuk kanë denoncuar ndërtimet pa leje kur kanë “lulëzuar në sy të të gjithëve”, por jo të kryeministrit. Sikundër është mësuar që përgjegjësinë ta kthejë në vetjake e jo kolektive, këtë herë Ramë vuri në shënjestër policinë bashkiake.

“Ndërtimet pa leje me javë e me muaj, në sy të të gjithëve dhe askush nuk i denoncon, kjo është bashkëfajësi, dhe për këtë do të ketë masa penale. Njerëzit që përfaqësojnë shtetin nuk mund të luajnë me dy porta në këtë farë mënyre. Policia e shtetit nuk ka për detyrë të merret me lejet e ndërtimit apo me kontrollet e tyre, por do të ketë detyrimin të informohet nëse ka apo jo leje ndërtimi, kaq. Nëse po respektohet leja, është çështje e policisë bashkiake. Ata janë përgjegjës për aktet e kontrollit, të cilat në shumë raste janë të gjitha për ndjekje penale, sepse firmosen sipas qejfi”, deklaroi kryeministri.

Pra, Rama i godet në mënyrë të drejtpërdrejtë strukturat bashkiake të kontrollit të territorit, teksa i paraqet si hallka të korruptuara që lejojnë ose mbështesin ndërtimet pa leje, duke përjashtuar Policinë e Shtetit.

Duke iu referuar deklaratës së kryeministrit që flet për “lojë me dy porta”, duhet të theksojmë se është vetë shteti ai që luan me dy porta dhe ka disa arsye se pse ngrihet pyetja: Po Rama, a ka qenë me sy mbyllur gjithë këto vite, apo është pjesë e lojës?

Mungesa e shtetit në terren

Kur ndërtimet pa leje ngrihen javë pas jave, mu në mes të qyteteve, para syve të bashkive, të policisë, të zyrave të urbanistikës, lind një pyetje e thjeshtë: ku është shteti? Nëse ndërtohet lirshëm dhe pa frikë, kjo nuk ndodh sepse shkelësit janë të padukshëm, por sepse institucionet janë të pafuqishme ose të heshtura. Deklaratat e Ramës për masa penale tingëllojnë si teatrale në një vend ku gjithçka ka ndodhur haptazi, dhe askush nuk është ndëshkuar.

Tolerimi selektiv dhe klientelizmi

Shumë ndërtime pa leje nuk janë bërë nga qytetarë të thjeshtë që kërkojnë një shtesë mbi banesë, por nga ndërtues të lidhur me pushtetin, të cilët kanë ndjerë sigurinë për të shkelur ligjin sepse janë të “mbrojtur”. Lejet e heshtura, toleranca për të fortët dhe selektiviteti në ndërhyrje, janë kthyer në rregull loje. Deklarata e Ramës nuk i përmend emrat që duhet t’i përmendë – ndërtuesit e paprekshëm që ndërtojnë mbi ligjin.

Shteti “me satelitë” që nuk sheh pallatet

Qeveria është krenuar për "monitorimin satelitor" të territorit dhe për digitalizimin e kontrollit të ndërtimit. Por ndërkohë që një fermer në fshat penalizohet për një kasolle, pallate pa leje ngrihen në qendrat urbane pa u shqetësuar askush. Ironikisht, satelitët shohin gjithçka, përveç asaj që ndodhet përballë syve të pushtetit. Në këtë realitet, teknologjia është propagandë dhe jo mjet i ligjit.

Përgjegjësia direkte e pushtetit vendor

Në shumicën e bashkive të vendit, pushteti vendor është në dorë të Partisë Socialiste. Nëse ndërtimet pa leje janë bërë në heshtje dhe pa kontroll, kjo është përgjegjësi direkte e atyre që drejtojnë bashkitë dhe zyrat vendore të urbanistikës. Rama nuk po godet abuzuesit, por realisht po shfajëson të vetët, duke shmangur përgjegjësinë që bie mbi strukturat e tij lokale. “Shkeljet janë në sy të të gjithëve” – përveç syve të partisë.

Drejtësia selektive dhe mungesa e ndëshkimit

Qytetarët e thjeshtë shembin muret me duart e tyre kur marrin një paralajmërim për ndonjë shtesë pa leje, ndërsa vila dhe pallate të mëdhenj që ndërtohen në kundërshtim me ligjin nuk preken. Kjo drejtësi me dy standarde ka krijuar një hendek mes qytetarit të zakonshëm dhe të fortit me lidhje. Në këtë klimë, Rama flet për penalizime, por qytetarët nuk shohin askënd me pushtet që dënohet – vetëm të vegjël që përdoren si shembuj për kamerat./ Politiko.al