Si nisi dhe çfarë është dosja ‘Babale’ që çoi në burg deputetin Ervin Salianji

Gjykata e Apelit la sot në fuqi dënimin me 1 vit burgim për deputetin demokrat Ervin Salianji. Ai akuzohet për “Kallëzim të rremë” për rastin e audio-përgjimit ku pretendohej se vëllai i ish ministrit të Brendshëm Fatmir Xhafaj, i përfshirë në një episod trafiku droge.

Vendimi, i shpallur nga trupi gjykuesr me relatore Elona Toro dhe anëtarë Iliba Bezati dhe Genti Shala, për të dënuar deputetin Salianji nga Gjykata e Apelit është pritur me tensione sepse pas vendimit kolegët e tij hodhën akuza drejt gjykatës për vendimin e marrë. 

Me vendimin e sotëm të Gjykatës së Apelit, Salianji pritet t’i nënshtrohet procedurave për të nisur vuajtjen e dënimit, duke qenë se bëhet fjalë për një vendim të formës së prerë. Kushtetuta parashikon se në një rast të tillë, mandati i një deputeti bëhet i pavlefshëm. Salianji po ashtu, do të humbasë edhe mundësinë për të kandiduar dhe në zgjedhjet e ardhshme parlamentare.

Si nisi dhe çfarë është dosja Babale?

Dënimi ndaj Salianjit lidhet me një audio-përgjim të publikuar prej tij në Partinë Demokratike në maj të vitit 2018, ku aludohej se vëllai i ministrit të Brendshëm të kohës, Fatmir Xhafajt bisedonte me një shtetas të quajtur Albert Veliu në lidhje me trafikun e drogës.

Pas publikimit të audio-përgjimit, Geron Xhafaj kreu kallëzim për akuzuesit e tij, duke pretenduar se audio-përgjimi ishte i sajuar. Pasi kreu kallëzimin, Geron Xhafaj iu dorëzua autoriteteve italiane të drejtësisë për të vuajtur një dënim më të hershëm për trafik droge.

Salianji u dënua më 18 dhjetor 2019 me 1 vit burg në shkallën e parë, ndësa i akuzuari si bashkëpunëtor po për “kallëzim të rremë”, gazetari Jetmir Olldashi u dënua me 6 muaj heqje lire, por që u pezullua ekzekutimi i kësaj mase dhe dënimi u konvertua me 100 orë pune në interes të publikut.

Për të pandehurin Albert Veliu u vendos dënimi me 10 muaj burg për veprën penale “Kalim i paligjshëm i kufirit” dhe 2 vjet e 10 muaj burgim “Kallëzim i rremë” në bashkëpunim, që në bashkim të tyre u vendos dënimi final me 3 vjet e 5 muaj burgim. Fredi Alizoti u dënua me dy vjet burgim për “Kallëzim të rremë”. Vendimi në shkallën e parë u dha nga gjyqtari Artan Gjermeni.

Dënimi i gazetarit Olldashi

Bashkë me Salianjin, fajtor u shpall edhe gazetari Jetmir Olldashi nën akuzën e 'kallëzimit të rremë'. Për këtë të fundit vendimi i Gjykatës së Apelit është 100 orë punë në komunitet.