S’ka marrëveshje, PD sërish drejt një ‘6 marsi’ të dytë

Përpjekjet e demokratëve për t’u bashkuar para zgjedhjeve lokale të 14 majit, dështuan sërish.

Rrjedhimisht, kjo bën që PD rrezikon të shkojë sërish e ndarë në dy grupe në zgjedhjet vendore të vitit të ardhshëm.

Pas disa javësh negociatash mes dy të mandaturve Edi Paloka dhe Gazment Bardhi, grupi që mbështet Enkelejd Alibeajn ka vendosur të dalin me kandidatët e tyre në zgjedhjet lokale.

Vendimi është marrë sot gjatë mbledhjes së Alibeajt me deputetët e PD-së, pas tre takimeve të zhvilluara mes të mandatuarve, Bardhi-Paloka.

“Grupi Parlamentar i Partisë Demokratike ka kërkuar të informohet Kryesia e Partisë Demokratike, për ti hapur rrugë krijimit të të gjitha kushteve për përgatitjen dhe pjesëmarrjen e Partisë Demokratike në zgjedhjet e ardhshme vendore”, thuhet ndër të tjera në deklaratën për mediat.

Pas dështimit të negociatave, PD rrezikon kështu të përsërisë skenarin e 6 marsit, ku partia më e madhe opozitare në vend garon sërish e ndarë si në zgjedhjet e pjesshme të këtij viti.

Zgjedhjet u zhvilluan në Shkodër, Dibër, Durrës, Vorë, Rrogozhinë dhe Lushnjë, por fraza “zgjedhje të pjesshme” e humbi vlerën për arsye të situatës politike në PD. 

Gara më e fortë ishte brenda opozitës, mes Partisë Demokratike, asokohe të drejtuar ende nga Lulzim Basha dhe lëvizjes së udhëhequr nga ish kryeministri Sali Berisha, ‘Shtëpia e Lirisë’. 

Partia Socialiste fitoi zgjedhjet në 5 nga 6 bashkitë, ndërsa PD e përfaqësuar nga Berisha mori Shkodrën përmes Bardh Spahisë, ndërkohë që në bashkitë e tjera, kandidatët e SHL morën më shumë vota se kandidatët që përfaqësonin grupin e Bashës.

Po ashtu, Partia Demokratike, mbetet e ndarë ligjërisht dhe formalisht mes grupit të mbështetësve të ish-kryeministrit Sali Berisha, dhe grupit të deputetëve kundërshtarë të tij, të cilët janë pa një kryetar formal por që kanë një kontroll nominal ligjor. Gjykata e Apelit duhet të japë një vendim për mosmarrëveshjen e të dy grupeve pasi gjykata e shkallës së parë i dha të drejtë ish-kryeministrit Berisha muaj më parë.