Skandali “Rama- McGonigal” unifikon PD-në, firmosin për ngritjen e Komisionit Hetimor, kush do jetë edhe në protestë

Sinjale bashkimi janë dhënë nga të dy kampet e demokratëve, ndërsa politika prej ditësh vlon pas skandalit të ish-agjentit special të FBI, Charles McGonigal dhe lidhjeve të tij me kryeministrin Edi Rama.

Ashtu siç paralajmëruan, deputetët e Partisë Demokratike, Luçiano Boçi dhe Albana Vokshi dorëzuan sot në Kryesinë e Kuvendit, kërkesën për ngritjen e Komisionit Hetimor, që do të verifikojë kontaktet dhe marrëdhëniet e kryeministrit Edi Rama me ish agjentin special të FBI-së, Charles Mcgonigal.

Deputeti Boçi u shpreh se për ngritjen e këtij komisioni kanë firmosur 44 deputetë të PD-së, përfshirë edhe deputetë të grupit të Alibeajt si Gazmend Bardhi, Jorida Tabaku, Lefter Gështenja dhe Andia Ulliri, por nuk ka firmosur kryetari i grupit parlamentar, Enkelejd Alibeaj.

Boçi u pyet nga gazetarët nëse firma e Bardhit sinjalizon bashkimin e PD-të, i cili u përgjigj se “Sigurisht që po. Duam që raste të tilla të bashkëpunimit të jenë në vijimësi, na duhen edhe qëllime të njëjta”.

Një ditë më parë, në mbledhjen e grupit parlamentar demokrat, edhe kreu i PD, Sali Berisha përshndeti depokratët që iu bashkuan nismës.  

'I përgëzoj të gjithë deputetët që kanë firmosur në këtë Komision Hetimor Parlamentar dhe e siguroj Komisionin Hetirpor Parlamentar të Kongresit të SHBA se komisioni ynë do të bëjë gjithçka për të zbardhur veprimtarinë kriminale të Edi Ramës, të McGonigal në Shqipëri, të Marco Ross-it dhe grupit të tyre.

Duhet të dini se, jo vetëm në këtë fushë, por edhe në aspekte të tjera, këta aventurierë kanë luajtur me interesa të një rëndësie jetike për SHBA. Komisioni do t’i rreshtojë të gjitha këto, si një detyrim madhor ndaj SHBA. Mos prisni nga SKAP-i i partisë. Mc Gonigal është ulur këmbëkryq me ta. Jo një herë, por disa herë. Hetimin më të plotë do ta bëjë komisioni hetimor parlamentar.”, tha Berisha.

Lista e 44 deputetëve që firmosën: 

Protesta e 11 shkurtit

Kryedemokrati lajmëroi së fundmi se PD po organizohet të mbajë një protestë kombëtare në 11 shkurt.

Deputeti i Partisë Demokratike, Gazment Bardhi tha dy net më parë se mbështet protestën e thirrur nga Berisha, i cili pas mbledhjes së Kryesisë këtë mbrëmje bëri me dije se është parashikuar të mbahet para Kryeministrisë për skandalin e ish-zyrtarit të FBI-së.

“Nëse bëhet fjalë për skandalin McGonigal është kundër qeverisë dhe unë mbështes çdo protestë kundër qeverisë,” – u shpreh Bardhi në “Noë me Erla Mëhillin”, i cili shtoi se do të jetë i pranishëm në protestë.