“Tallava mediatike për favore”, si ndryshoi retorika e Ramës ndaj TCH dhe gënjeshtra për media të lirë

“Nuk ka mundësi e shans të dalë dikush nga Top Channel qofshin pronarë apo gazetarë të thotë që në një sekondë të ketë ndjerë që qeveria t’i ketë ushtruar presion apo polemikën ta ketë parë në një polemikë të përkthyer në veprim”.

Kjo ka qenë deklarata e kryeministrit Edi Rama dje teksa komentoi sulmin me armë ndaj Top Channel, ku mbeti i vrarë roja i sigurisë, Pal Kola. Rama mohoi që të ketë ushtruar presion jo vetëm ndaj TCH, por edhe ndaj mediave të tjera duke argumentuar se sot mediat dhe gazetarët janë më të lirë së kurrë.

“Kjo nuk është një ngjarje e radhës, është një nga ato ngjarje që ndodhin si rrufe në qiell të pastër dhe nuk përbën vazhdimësi, kjo është diçka e lidhur drejtpërdrejtë me Top Channel, qeveria ka qenë një ndër shënjestrat e Top Channel dhe jam sot këtu e ajo çfarë mund të them është se nuk ka mundësi e shans të dalë dikush nga Top Channel qofshin pronarë apo gazetarë të thotë që në një sekondë të ketë ndjerë që qeveria t’i ketë ushtruar presion apo polemikën ta ketë parë në një polemikë të përkthyer në veprim. Që serioziteti i kësaj çështje është kaq i madh është dhe ju siguroj që e kuptoj dhe ndjej shumë thellë këtë goditje dhe do bëjmë çmos të gjejmë autorët, i them individëve që janë pjesë e këtij institucioni të vazhdojnë kryelartë misionin e tyre”, deklaroi Rama.

Madje Rama u shpreh edhe që qeveria e tij nuk ka ndërhyrë kurrë në asnjë milimetër të lirisë së medias. “Unë dhe qeveria që unë drejtoj nuk kanë ndërhyrë kurrë në asnjë milimetër të lirisë së medias”, vijoi kryeministri.

Por, ajo çka Rama deklaron sot nuk përputhen me retorikën e përdorur kundrejt Top Channel, kur ky i fundit filloi “të godiste” qeverinë duke filluar nga të pastrehët e tërmetit të 26 Nëntorit, tek emigrimi masiv i të rinjve, e deri te sulmi kibernetik iranian që paralizoi sistemin digjital të Shqipërisë.

Kronikat antiqveritare të Top-it

Televizioni kombëtar nisi papritur “t’i qepej” qeverisë me skandale e afera duke transmetuar një sërë kronikash që godisnin qeverinë Rama.

Top Channel u fokusua tek emigracioni masiv i të rinjve me një kronikë me titullin “Një në tre shqiptarë iku nga Shqipëria”. Kronikat vijuan me “Kryeministri merr ‘peng’ diplomat”, “Të pastrehët e tërmetit”, “Hakerat kërkojnë 30 mln dollarë. Virusi ka shkatërruar të dhënat online të institucioneve”.

   

Një kronikë e fortë për qeverinë ishte edhe raporti për Demokracinë i cili e poziciononte Shqipërinë me shumë vende në rënie. Top Channel asokohe, zgjodhi t’i transmetonte gjetjet e raportit duke e përkufizuar si “Shqipëria drejt autokracisë”.

Rama reagon me gjuhë të ashpër ndaj Top Channel

Gjuha e Ramës kundrejt TCH ishte mjaft e ashpër. Kryeministri, siç bën gjithmonë, zgjodhi që kritikat ndaj televizionit për kronikat antiqeveritare, t’i jepte përmes Twitter-it.

Rama i konsideroi një “tallava mediatike” akuzat se hakerat iranianë i kishin kërkuar qeverisë 30 milionë dollarë me qëllim që t’i jepnin fund “grabitjes” së të dhënave institucionale dhe qytetare.

  

Kronikës për ermigracionin e paligjshëm masiv të shqiptarëve drejt Britanisë së Madhe, Rama e quajti një “lajm të rremë për favore të paligjshme”.

“Shumëkush ka mbetur i çuditur këtë të dielë kur ka parë një tëitter të kryeministrit i cili akuzonte një televizion kombëtar për përfitime të paligjshme. Sipas Ramës prej këtij ekrani dezinformohej për të ngritur njerëz kundër qeverisë. “700 mijë shqiptarë kanë ikur 12 vitet e fundit”. “7 punonjës në ditë ikin nga policia”. ”Tre vite pas tërmetit s’kanë shtëpi”. Këta janë tituj lajmesh të rreme në ekrane private kombëtare që kanë një mision: Dizinformim e nxitje kundër qeverisë!Arsyeja? Duan favore të paligjshme”, shkroi Rama asokohe në Twitter.

Pas disa kohësh, u vu re që TCH iu rikthye normalitet dhe nuk pati më kronika që sulmonin apo godisnin qeverinë. Një prej tyre, ishte raporti për demokracinë, që kësaj here TCH raportonte se Shqipëria nuk po shkonte më drejt autokracisë, por kishte bërë ndjeshëm përmirësim.

Rama bie ndesh me raportin e DASH

Kryeministri konsideroi se regjimi i tij është treguar “zemërmirë” me mediat dhe gazetarët kur tha se media nuk ka qenë kurrë më e lirë se sot. Mirëpo, Rama harron raportin e fundit të Departamentit të Shtetit (DASH), i cili theksonte qartazi mungesën e lirisë së medias dhe censurën që i faturohej gazetarëve.

Sipas raportit, vëzhguesit pohojnë se “qeveria, partitë politike, bizneset dhe grupet kriminale u përpoqën të ndikonin në media në mënyra të papërshtatshme dhe jotransparente”.

Ka media të lira dhe një përhapje të madhe të organeve të medias, veçanërisht në internet, që përfaqësojnë një spektër të gjerë pikëpamjesh pa përgjegjësi, shpesh pa e atribuar informacionin.

“Megjithatë, janë të pakta mediat e pavarura, pasi shumica e mediave janë në pronësi të biznesmenëve me peshë që kanë interesa të mëdha, të cilët përdorin mediat e tyre për të avancuar interesat e tyre, përfshirë përfitimin dhe nxitjen e interesave që kanë me partitë politike”, thuhet në raport.

Po ashtu DASH nënvizonte se ka pasur raporte të besueshme sipas së cilave, përfaqësuesit e lartë të mediave përdornin organet e tyre për të ushtruar shantazh ndaj bizneseve, duke i kërcënuar ato me pasqyrim negativ.

“Presioni politik, korrupsioni dhe mungesa e fondeve kufizuan median e pavarur të shkruar dhe gazetarët thuhet se kanë praktikuar autocensurë”, thuhet në raport.

Megjithatë, kryeministri bën “një sy qorr e një vesh shurdh” kur bëhet fjalë për kritikat ndaj qeverisë së tij.