Turbulloi më shumë 'ujërat' në PD, e kujt është vila 760 mijë euro në Gjirin e Lalzit?

Një denoncim i Gazment Bardhit ‘i ka turbulluar më shumë 'ujërat' brenda Partisë Demokratike, e cila prej muajsh është e përfshirë në konflikt të brendshëm.

Bardhi shkroi në rrjetet sociale se një 'deputet i Rithemelimit është marrë peng nga Edi Rama pasi i është gjetur një vilë më vlerë 760 mijë euro në Gjirin e Lalzit'.

“Pyetje për “opozitën e vërtetë”; vilën 760 mijë euro, e shitën apo spo ja ble askush ????? Nuk mund të mbash peng opozitën për një vilë të pajustifikuar që të ka zbuluar dhe me të cilën të mban peng Edi Rama!!!” shkroi Bardhi.

Deputeti demokrat nuk dha emër kujt i drejtohet, por mbrëmë në ‘Open’ në News 24 deklaroi se mund t’i përkasë njërit nga 4 deputetëve të PD, ish-ministra të Berishës, që i bie të jenë: Flamur Noka, Tritan Shehu, Edmond Spaho ose Bujar Leskaj.

Vila ‘mollë sherri’ në Kuvend

Deklarata e Bardhit u bë ‘mollë sherri’ në seancën e sotme në Kuvend mes vetë demokratëve. Demokratët Gazment Bardhi, Tritan Shehu dhe Edmond Spaho u përfshinë një debat me fjalë fyese gjatë seancës.

Shehu dhe Spaho i kërkuan Bardhit të mos shpifë, por situata u tensionua me replika me tonë të larta. Më pas deputetët reaguan përmes rrjeteve sociale. Spaho e akuzon Bardhin për mashtrues, duke vijuar me pretendimin se deklaratat e tij janë të rreme.

 

Edhe Shehu i cilëson “inskenime të pista”, duke shtuar se nëse ka prova të shkojë dhe t’i çojë para drejtësisë. Shehu i kujton Bardhit se nëse ai di një rast dhe nuk e denoncon, është duke kryer vepër penale.

Më vonë, Bardhi bëri ironi në rrjetet sociale duke publikuar edhe detaje nga vila në fjalë, e cila sipas tij e kishte ulur çmimin nga 760 mijë euro në 670 mijë euro ndërkohë që publikoi në Facebook.

Pamjet e vilës luksoze

Po sot, kanë dalë pamjet e vilës luksoze që solli përplasje ditën e sotme në Kuvend.

Vila është nxjerrë në shitje dhe më shume detaje për të ka nxjerrë agjensia imobilare. Vila ka 10 dhoma, nga të cilat 7 janë dhoma gjumi si edhe 4 tualete. Ajo është e ndërtuar në 810 metër katrorë tokë dhe ka një sipërfaqe neto prej 400 metrash katrorë ndërtim.