Veliaj, 'limon i shtrydhur' apo 'molla e kalbur' që lëshoi sot Edi Rama

“Kush e ushqen me korrupsion krimin e dëshirës për vetëpasurim përmes funksionit publik, nuk është një limon i shtrydhur që e hedh unë, por një mollë e kalbur që bie vetë".

Ishte kjo një nga frazat e kryeministrit Edi Rama sot kur foli për rreth dy orë para ministrave dhe deputetëve socialistë, duke ua bërë të qartë dhe duke u treguar qelinë të gjithë atyre që sipas tij shkelin 'në dërrasë të kalbur', teksa heq përgjegjesitë nga vetja, për vartësit që emëron vetë. 

Gjatë fjalimit të gjatë, duket se Rama i ka dhënë një mesazh të qartë edhe kryebashkiakut Erion Veliaj, pas skandalit korruptiv “5D” dhe pas disa ditësh i thirrur në SPAK ku dëshmoi për rreth 7 orë lidhje me mega aferën e inceneratorit fantazëm.

“Ashtu sikur dikush që është zgjedhur në krye të një bashkie, nëse fut duart në arkat e këtij shteti dhe xhepat e këtij populli, nuk është me ne. Nuk ka se si të jetë ne dhe as se si të kërkojë gjë tjetër nga ne përveç përbuzjes.

E thënë ndryshe, çdo anëtar i kësaj familjeje politike që bën korrupsionin në funksionet publike është një tradhtar i dyfishtë, jo vetëm i popullit shqiptar si çdo hajdut me kostum që merr çfarë nuk është e tij, por edhe i PS-së si çdo parazit që ushqehet me gjakun e trupit ku rritet”, u shpreh Rama ndër të tjera, duke ia thënë troç se ai nuk lëshon vetëm djalin e vogël në ndonjë shkëmb mbi det kur do të hidhet.

“Unë nuk lëshoj vetëm djalin e vogël në ndonjë shkëmb mbi det kur do të hidhet. Por nuk mbaj asnjë burrë me para të vjedhura në karrige kur vjen ora të thirret. Jo po nuk kam bërë asgjë, po më bien në qafë. Nëse nuk ke bërë asgjë nuk të mbaj as unë as PS, por e vërteta.

Prandaj lufto për të vërtetën tënde. Sepse kjo parti dhe kjo qeveri nuk bëjnë asnjë koment për çështjet që hap SPAK. Jo më avokatin e një drejtori, kryebashkiaku, ministri, deputeti apo ish ministri”, shtoi kryesocialisti.

"Pret kokën" e Veliaj nga foto me Ahmetin

Krisja e raporteve Rama-Veliaj nuk u kalua në heshtje edhe para disa ditësh.

Dhënia e titullit “Qytetar Nderi i Tiranës” për Ali Ahmetin, e riktheu kryeministrin Rama në dyert e Bashkisë së Tiranës.

Pritja u bë nga kryetari Erion Veliaj, por ftohja mes tyre u pa në dy momente kyçe.   

Sapo mori fjalën, Rama u shpreh se vetëm Ali Ahmeti mund ta rikthente në Bashkinë e Tiranës, duke treguar se nuk ka asnjë arsye që të vizitojë kryebashkiakun e tij në këto kohë kur ai po përballet me sulmet e vazhdueshme nga opozita dhe jo vetëm.

Më vonë, kryeministri publikoi një foto në të cilën ishte edhe Veliaj, por këtë të fundit e kishte prerë, duke e postuar foton pa kryebashkiakun.

Një mesazh i qartë për Veliajn, i cili sulmet e vazhdueshme do të duhet t’i përballojë i vetëm, teksa Rama tregon edhe një herë tjetër se i lëshon të gjithë ata që kanë probleme me drejtësinë, dhe këtë herë duket se e radha është në dyert e Bashkisë që drejton prej tre mandatesh e Erion Veliaj.