10 vjet nga 21 janari, xhaxhai i Aleks Nikës për Politiko: Janë mbledhur prova të reja, por drejtësia heziton të zbardhë çështjen

Sot u mbushën 10 vjet nga protesta e Partisë Socialiste në 21 janar, ku mbetën të vrarë në bulevardin “Dëshmorët e Kombit”,  Aleks Nika, Ziver Veizi, Hekuran Deda dhe Faik Myrtaj. 

Ndonëse ka kaluar një dekade që prej asaj ditë, familjarët janë ende në pritje të drejtësisë. Me karafila të kuq në duar, qeveria Rama i kujtoi ashtu si nëntë vitet e shkuara me homazhe në vendet ku ata u qëlluan për vdekje, ndërsa katër protestuesit u shpallën ‘Dëshmorët e atdheut’.

Mark Nika, xhaxhai i Aleks Nikës thotë për Politiko.al se ky ishte një vlerësim që duhej të ishte bërë që në fillim.

“Edhe po të mos i shpallte Rama, ata ishin dëshmorë të atdheut. Ata ishin katër protestues që u vranë për të rivendosur drejtësi në Shqipëri. Ky është një vlerësim, që duhej të ishte bërë që në fillim, por më mirë vonë se kurrë”, thotë Nika, i cili pohon që në fillim të bisedës se prej 10 vitesh nuk ka lënë derë pa trokitur në kërkim të drejtësisë së munguar, por së fundmi sheh optimizëm. 

“Nuk kam lënë derë pa trokitur në kërkim të drejtësisë dhe e shoh se do të jetë e vështirë shumë, ndonëse kam edhe pak optimizëm. Autoritetet kanë arritur të grumbullojnë prova të reja. Mendohet se ka edhe predispozicion edhe politik që kjo çështje të zbardhet. Ajo është e zbardhur por unë nuk e di pse heziton drejtësia, të paktën t’i thërrasë Berishën, Bashën.

Kërkoj që gjykata të zhvishet nga politika për të gjykuar në mënyrë të drejtë këtë çështje, ministria e Brendshme duhet të kërkojë ndihmë profesionale për ekspertizën”, thotë Mark Nika.

Ai shton se çështja e dënimit të autorëve është zvarritur, por për këtë nuk ka faj policia apo qeveria, por segmente të tjera të drejtësisë. Ai tha se nuk pret drejtësia nga qeveria dhe se me përfundimin e reformës në drejtësi shpreson të ketë një vendim të drejtë për të autorët që vranë 4 protestuesit.

I pyetur lidhur me kërkesën e policisë për rihapjen e hetimeve pas 10 vitesh dhe se një ndër pikat e renditura është që predha në trupin e Aleks Nikës të dërgohet për ekzaminim jashtë vendit, ai thotë se këtë gjë e ka në dorë vetëm prokuroria.  

“Atë e ka në dorë prokuroria, se nuk është e bindur se ka prova pasi kam kontaktuar vetë me ta. Ata janë gjithmonë pjesë e Berishës. Nuk ka drejtësi me ata që ka emëruar kryeministri i asaj kohe. Edhe drejtësia e ka frikë Berishën. E njoh personalisht dhe nuk është trim”, thotë ai, ndërsa është i bindur se me 21 janarin bëhet politikë nga të gjitha palët.

“Patjetër, po te mos ishte politika, do të ishte e zgjidhur si ceshtje. Ka ndërhyrë patjetër politika dhe është zvarritur ditë pas dite. Do kërkoja që të ndërhynin edhe ndërkombëtarët, jo për zgjidhjen e çështjes por të asistojnë me ekspertë”, thotë Mark Nika për Politiko.al. 

Çfarë ndodhi 10 vjet më parë?

Më 21 Janar të 2011-ës kur Partia Socialiste ishte në opozitë zhvilloi një protestë kundër qeverisë në atë kohë në koalicion mes PD dhe LSI.

Ajo nisi si marshim i qetë protestues, por përfundoi me katër viktima, Hekuran Dedën, Ziver Veizin, Faik Myrtajn dhe Aleks Nikajn. Ky i fundit, pas mjekimit fillimisht në Spitalin Ushtarak të Tiranës, u dërgua për kurim të specializuar në Turqi, ku dhe ndërroi jetë pas disa ditësh.

Protesta e PS erdhi pas skandalit të publikuar në ‘Fiks Fare’ të një video ku shfaqej Ilir Meta dhe ish-Ministrit të Ekonomisë Dritan Prifti, duke diskutuar për një koncesion, që sipas opozitës në atë kohë ishte korruptive në kurriz të shqiptarëve.

Nga ana tjetër, Berisha deklaroi se kjo lloj proteste ishte puç i Ramës për t’i marrë pushtetin me dhunë. Madje, ai sulmoi ashpër edhe Prokurorinë, SHISH-in dhe Presidentin e Republikës.

Pavarësisht përmasave të ngjarjes së asaj dite, sot nuk ka asnjë të dënuar. Pas seancave maratonë, dy personat e dyshuar, ish-komandanti i Gardës së Republikës, Ndrea Prendi dhe përgjegjësi i njësisë speciale, Agim Llupo u shpallën të pafajshëm. Garda e Republikës paditi ish-drejtuesit e saj për vrasjet.
S.F/ Politiko.al