Flash News

Posta e mëngjesit/ Me 2 rreshta: Çfarë pati rëndësi dje në Shqipëri

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

E-TJERA

1500 euro për të hyrë ‘mik’ te gjyqtari, SPAK çon për gjykim ish-audituesin e KLSH dhe bashkëpunëtoren e tij

Politiko 6 Gusht 2025, 10:18

1500 euro për të hyrë ‘mik’ te gjyqtari, SPAK

Prokuroria e Posaçme kundër Korrupsionit dhe Krimit të Organizuar ka përfunduar hetimet dhe ka dërguar për gjykim çështjen penale ndaj dy të pandehurve: Bardhi Koçi dhe Pranvera Meshi.

Sipas SPAK, avokati Bardhi Koçi – i cili në kohën e veprave penale ishte i punësuar si auditues në Kontrollin e Lartë të Shtetit – akuzohet për tre episode të “Ushtrimit të ndikimit të paligjshëm ndaj personave që ushtrojnë funksione publike”, parashikuar nga neni 245/1 i Kodit Penal.

Ndërsa Pranvera Meshi, e akuzuar më herët për falsifikim të dokumenteve shëndetësore, akuzohet gjithashtu për ushtrim ndikimi të paligjshëm.

Sipas dosjes së SPAK, Koçi kërkoi dhe mori 1000 euro nga Pranvera Meshi, në këmbim të ndikimit në një gjyqtar që po shqyrtonte çështjen ndaj saj. Po ashtu, ai kërkoi 1300 euro nga shtetasi A.M., për të ndikuar tek funksionarë të drejtësisë për përshpejtimin e një seance për caktim mase sigurie.

Prokuroria ka dokumentuar edhe dy episode të tjera të ndikimit të paligjshëm dhe po vijon hetimet për fakte shtesë që kanë dalë nga kjo çështje.

“Shtetasi, Bardhi Koçi, me profesion avokat (i cili në kohën e kryerjes së veprave penale ishte i punësuar me detyrë Auditues në Kontrollin e Lartë të Shtetit) ka kërkuar nga shtetësja Pranvera Meshi, shumën prej 1500 (një mijë e pesëqind) euro dhe ka marrë prej saj në formën e përfitimit të parregullt, shumën paraprake prej 1000 (një mijë) eurosh, me qëllim ushtrimin e ndikimit në vendimmarrjen e gjyqtarit, i cili po shqyrtonte çështjen në ngarkim të saj.

Shtetasi, Bardhi Koçi, ka kërkuar nga shtetasi A.M., shumën prej 1300 (një mijë e treqind) eurosh, me qëllim ushtrimin e ndikimit tek dy funksionarë të sistemit të drejtësisë, me qëllim përshpejtimin e seancës gjyqësore për caktimin e masës së sigurimit personal ndaj shtetases N.M., e arrestuar për veprën penale, “Drejtimi i automjeteve në mënyrë të parregullt”, e parashikuar nga neni 291 i Kodit Penal.

Gjithashtu shtetasi Bardhi Koçi ka marrë përfitime të parregullta nga shtetasi, R.G., me qëllim ushtrimin e ndikimit tek ekspertët e Institutit të Policisë Shkencore. Ky ndikim kishte të bënte me nxjerrjen e aktit të ekspertimit kimik për një sasi lënde narkotike, e cila i ishte sekuestruar shtetasit B.G, i dyshuar për veprën penale, “Drejtimi i automjeteve në mënyrë të parregullt”, e parashikuar nga neni 291 i Kodit Penal”, thuhet në njoftimin e SPAK.