Flash News
Berisha: Ishim opozita e parë që kërkuam anëtarësimin në NATO pas rënies së komunizmit
Lirohet nga qelia ish-kryebashkiaku i Fushë Arrëzit, Fran Tuci
Konstituimi i grupit të dialogut PD-PS, Bylykbashi: Prioritet është Reforma Zgjedhore
Konstituohet grupi i dialogut mes opozitës dhe mazhorancës për ‘Reformat’
Tragjikomedia e AADF me Butrintin: Një i panjohur do të drejtojë bordin shkencor të fondacionit
"Mbi 200 çartera drejt Turqisë vetëm në muajin e fundit"/ Mjekësia është 'falas', por shqiptarët e 'blejnë' shëndetin shtrenjtë, deri në kufijtë e varfërimit
Kur vjen puna te shëndeti askush nuk bën llogari, por shpenzimet e shqiptarëve janë dramatike. Gazeta MAPO i ka kushtuar një artikull shpenzimeve marramendëse në mijëra euro, që shqiptarët harxhojnë për t’u kuruar nga COVID-19 në Turqi dhe Shqipëri.
Sipas raportit të gazetës, vetëm muajin e fundit ka pasur mbi 200 çartera mjekësorë nga Rinasi drejt Turqisë. Shifrat për trajtim janë kolosale, pasi vetëm fluturimi kushton nga 15 mijë deri në 20 mijë euro, ndërkohë që qëndrimi në spital varjon nga 1200 deri në 1500 euro nata.
Nga aeroporti i Rinasit të shtunën më datë 21 nëntor janë nisur 5 avionë charter me të sëmurë me COVID-19 drejt Turqisë. MAPO thekson se fluturimet e avionëve-ambulancë drejt Turqisë vijojnë ende dhe pse mediat turke lajmëruan dje se ministria turke e shëndetësisë u ka kërkuar kompanive private të mos pranojnë më pacientë nga jashtë për shkak të gjendjes emergjente ku ndodhet vendi me shtimin e rasteve të infektimeve.
Mirëpo edhe spitalet private në Tiranë, të cilët po shkojnë drejt fundit të kapaciteteve, nuk ngelen pas. Në disa raste, paguhen mbi 2 mijë euro nata, hoteleria plus shërbimi.
Kështu, ndërkohë që qeveria thotë se sistemi ynë shëndetësor ka kapacitete dhe ofron shërbim si gjithë Europa, shqiptarët po e “blejnë” shëndetin e tyre shumë shtrenjtë deri në kufijtë e varfërimit.
Qindra të sëmurë me Covid i janë drejtuar Turqisë dhe vendeve të tjera si Italia apo Austria për t’u kuruar, pasi nuk kanë pasur besim te spitalet tona, duke harxhuar dhjetëra mijëra euro. Ata shpenzojnë kursimet e jetës së tyre ose janë futur në borxhe të thella për të shpëtuar jetën.
Sipas një investigimi të fundit të BIRN, gjatë pandemisë pacientët shqiptarë kanë shpenzuar mbi 6.7 milionë euro për udhëtime dhe 12 milionë euro të tjera për kurimin në spitalet private jashtë vendit.
Numri i fluturimeve jashtë vendit për arsye kurimi u rrit nga 5 të tilla në muajin maj, kur epidemia COVID-19 ishte ende nën kontroll, në 152 fluturime gjatë muajit tetor. Ndërsa muaji nëntor shënoi një rekord të ri me 206 fluturime për qëllime mjekësore deri më datë 18.
Një pacient për t’u kuruar harxhon mesatarisht 45-50 mijë euro në spitalet turke, pa përfshirë këtu kostot shtesë të të afërmve të tyre që mund t’i shoqërojnë gjatë qëndrimit atje.
Ndërkohë që qindra shqiptarë po fusin veten në borxhe për t’u kuruar jashtë vendit, mijëra të tjerë po ashtu po kurohen privatisht në Shqipëri, duke i besuar spitaleve private ose mjekimit në shtëpi, pa asnjë ndihmë nga shteti.
Kjo sakrificë nuk vlen vetëm për ata që kanë marrë rrugët e qiellit për të shpëtuar. Kostot financiare për kurimin nga Covid-i po bëhen stratosferike dhe brenda vendit.
Me plotësimin e kapaciteteve në spitalet shtetërore, ku autoambulancat me të sëmurë qëndrojnë në oborret e spitaleve Covid, pacientët po i drejtohen spitaleve private duke pranuar kostot marramendëse të kurimit.
Me shifrat e fataliteteve në rritje shumë pacientë kanë frikë t’i drejtohen spitalit shtetëror. 45-vjeçarja E.V. tha për gazetën MAPO se iu desh të mjekonte prindërit e burrit në shtëpi duke marrë shërbim nga një spital privat në Tiranë pasi nuk kishte besim te shërbimi në spitalet shtetërore.
“Të dy të moshuar me sëmundje bashkëshoqëruese si diabet e tension u sëmurën me covid dhe gjithë kurimin e tyre e kam realizuar në privat pa asnjë shërbim të marrë nga shteti, përveç një vizite rutinë në fillim të sëmundjes te mjeku i familjes.
Dy mjekë vijnë t’i vizitojnë gjatë ditës me kosto 5 mijë lekë të rinj për vizitë. Pra, 10 mijë lekë të rinj në ditë për vizitat mjekësore plus blerja e ilaçeve dhe bombolës së oksigjenit, ne nuk dimë se sa do të na shkojë fatura përfundimtare e kurimit”- thotë ajo.
Nëse do t’i duhet të shtrojë vjehrrit e saj në spital ajo duhet të marrë parasysh një dhjetëfishim të kostove, pasi një natë shtrimi në spitalet private të Tiranës shkon në vlerën e 2000 eurove.
Përballë propagandës së "mjekësisë falas", të dhënat tregojnë se shqiptarët ua besojnë vizitat dhe kurimin e tyre klinikave dhe spitalet private, të cilat këto ditë nëntori kanë një fluks të madh mbingarkese me pacientë.
Për të mos vënë jetën e tyre në rrezik duke pritur radhën për një skaner apo tampon në shtet ata të dëshpëruar i drejtohen privatit ku sipas llogaritjeve vetëm kostoja e diagnostikimit shkon rreth 35-70 mijë lekë.
Sipas çmimeve, një tampon PCR te privatët kushton 12 mijë lekë; një skaner kushton nga 15 mijë deri në 35 mijë lekë dhe grupi i analizave të gjakut për të vlerësuar të gjithë parametrat që lidhen me Covidin kushtojnë midis 10-12 mijë lekë.
Kostoja e kurimit varet nga shkalla e sëmundjes, duke shkuar dhe deri në 1500 euro nëse do t’i duhet të marrë mjekim të specializuar dhe oksigjen.