Shqiptari që bën biznes me gomone, ‘Daily Mail’ fut në kafaz ‘Luanin e Artë’

Kalimi i paligjshëm i emigrantëve shqiptarë me gomone përmes Kanalit anglez, u bë jehonë në mediat vendase. Një muaj më parë prestigjiozet angleze, i kushtuan një sërë artikujsh kalimit dhe qëndrimit të jashtëligjshëm të shqiptarëve në Britani të Madhe, të cilët përbëjnë gati gjysmën e kalimeve përmes Kanalit.

Këtë herë ‘Daily Mail’ ka shkruar një artikull për një trafikant që në Shqipëri njihet me nofkën “Luani i Artë”, i cili dërgon emigrantë drejt Anglisë në rrugë të jashtëligjshme me gomone. ‘Luani i Artë’ është rrëfyer para gazetarëve të emisionit ‘Piranja’ të Abc News në bashkëpunim me Daily Mil.

Gazetarët janë maskuar si një çift i interesuar për të kaluar drejt Anglisë në rrugë të jashtëligjshme dhe e kanë takuar ‘Luanin e Artë’ në Place de la Gare në Dunkirk, stacion autobusësh dhe trenash në Angli. Në një kafene me pamje nga stacioni i trenit gazetarët u takuan me ‘Luanin e Artë’, i cili është me origjinë nga Vlora.

I veshur me pantallona të shkurtra dhe një bluzë Hugo Boss, ai u tha gazetarëve, se mund të organizonte vende në një varkë për më pak se 9,000 £ kur moti të përmirësohej. ‘Luani’ iu kërkoi  4500 £ për secilin për t’i kaluar përtej Kanalit duke iu garantuar se qeveria britanike do t’iu siguronte ushqim, batanije dhe gjithçka që u nevojiteshin përpara se t'i vendosnin në një hotel. “Pas kësaj, ju mund të shkoni ku të doni”, tha ai.

Për gazetarët e maskuar si çift i interesuar për të emigruar drejt Shqipërisë, ‘Luani’ tregoi se fitonte rreth 1 milion paund në javë duke dërguar emigrantë në Britani me gomone. Brenda pesë minutash, trafikanti kaloi pranë me një shok rrugës për në hotelin aty pranë Le Lion d'Or, ku ndodhet dhe nga i cili mori pseudonimin.

Pjesë nga biseda:

Luani: Do të të njoftoj, do të shkruaj mesazh në momentin e parë që ta marr vesh

Gazetari: Ne sa na thanë ata 4.500 paund

Luani: Jo, mund ta diskutojmë edhe për më pak

Gazetari: Mirë vllai rrofsh. Shikoje për veten tënde se unë kam probleme në Shqipëri

Luani: Do të flasim pak më vonë. I lutem Zotit që të bëhet se koha është ajo që të pengon, as unë as tjetri. Nëse deti është në rregull mund të ikni. Nuk varet nga unë varet nga koha.

Më shumë se 32,000 emigrantë kanë kaluar Kanalin Anglez me varka të vogla ose gomone deri këtë vit – më shumë se sa kanë kaluar gjatë gjithë vitit 2021.

Shqiptarët përbënin rreth 60% të ardhjeve në periudhën e verës. Udhëtimet me gomone janë shumë të rrezikshme dhe nganjëherë vdekjeprurëse. Këtu përmendim rastin e gomones me 27 emigrantë, përfshirë fëmijë, që u mbytën kur një gomone u rrëzua në Calais nëntorin e kaluar.