6 vatra zjarri në të gjithë vendin, Ministria e Mbrojtjes: Në monitorim zjarri në majën e Rrunës dhe Pukë

Ministria e Mbrojtjes ka reaguar përmes një komunikimi  lidhur me situatën e zjarreve në vendin tonë. Në këtë reagim paraqitet dhe një bilanc për situatën aktuale ku thuhet se janë 6 vatra aktive në të gjithë vendin - por që nuk janë rrezik për banorët dhe banesat e tyre.

Në këtë njoftim, Ministria e Mbrojtjes bën me dije se është në monitorim zjarri në majën e Rrunës dhe Pukë

Efektivë të Forcave të Armatosura, zjarrfikës si edhe punonjës të shërbimit pyjor po punojnë për neutralizimin e plotë të zjarreve në vend.

Njoftimi i plotë:

Aktualisht janë 6 vatra zjarri aktive në të gjithë territorin e vendit, por pa rrezikshmëri për njerëz dhe banesa.

Ndërsa gjatë natës janë riaktivizuar dy vatra zjarri në fshatin Patalej, njësia administrative Kolsh, bashkia Lezhë.

Efektivë të Forcave të Armatosura, të zjarrfikëses, shërbimit pyjor e bashkisë po punojnë për shuarjen e flakëve.

Zjarri në fshatin Thirrë, njësia administrative Fan, bashkia Mirditë është riaktivizuar, duke djegur  sipërfaqe pyjore me shkurre dhe dushqe.

Aktualisht vatra vazhdon me intensitet të ulët dhe strukturat janë në ndjekje të situatës. Në “Majën e Rrunës”, Laku i Mollave dhe Laku  i Thive, njësia administrative Malzi, bashkia Kukës, zjarri vijon të jetë aktiv, por me intensitet të ulët. Ditën e sotme ka filluar përsëri operacioni nga ajri dhe me forcat në terren. Situata është në monitorim.

Po ashtu një zjarr ka rënë në një sipërfaqe pyjore me shkurre dhe pisha në fshatin Mbreshtan, bashkia Kolonjë.

Zjarri është shumë larg nga zona e banuar dhe nuk paraqet rrezikshmëri, ndërsa situata është në ndjekje. Operacioni nga ajri ka vijuar sot edhe në vatrën e ndezur në një sipërfaqe pyjore me shkurre e pisha, në malin e Tërbunit, bashkia Pukë.

Dy vatra aktive zjarri vijojnë të jenë edhe sot, në një sipërfaqe pyjore me dushqe dhe shkurre, por me intensitet të ulët në fshatin Radat, bashkia Dropull. Edhe aty ka filluar sërish operacioni për shuarjen e flakëve.