6248 aksidente rrugore e 159 viktima në 2020, Urgjenca Mjekësore: Stop luftës së heshtur!

Qendra Kombëtare e Urgjencës Mjekësore deklaron se gjatë vitit 2020, edhe pse kishte një kufizim të lëvizjes për shkak të pandemisë, u regjistruan 6248 aksidente rrugore nga të cilat 159 persona humbën jetën.

Përmes një postimi në Facebook, Qendra Kombëtare e Urgjencave Mjekësore shkruan 13 këshilla për drejtuesit e makinave dhe qytetarët për të shmangur aksidentet dhe për të udhëtuar me kujdes.

Njoftimi i plotë:

Gjatë vitit 2020 janë regjistruar 6248 aksidente rrugore nga të cilat fatkeqësisht kanë humbur jetën 159 persona (kodi i zi)!! Një bilanc vërtetë i lartë, edhe pse gjatë 2020 patëm periudha me kufizim lëvizje. Sipas kodit të rëndesës (kodifikimit) aksidentet i ndajmë si më poshtë:

Kodi i Zi: 159 aksidente me pasojë vdekjen.

Kodi i Kuq: 1475 aksidente me rrezikshmëri të lartë për jetën.

Kodi i Verdhë: 2951 aksidente me dëmtime, por jashtë rrezikut për jetën.

Kodi Jeshil: 1549 aksidente jashtë rrezikut për jetën.

Kodi i Bardhë: 114 aksidente pa dëmtime dhe jashtë rrezikut për jetën.

Duke shprehur shqetësimin për numrin në rritje të aksidenteve rrugore, Qendra Kombëtare e Urgjencave Mjekësore ju këshillon të drejtoni mjetin tuaj me kujdes dhe brenda normave të lejuara.

QKUM bën thirrje për ndërgjegjësim dhe tregoni kujdes në ndjekjen e disa rregullave dhe këshillave:

1.Respektoni rregullat e qarkullimit rrugor si edhe sinjalistikën vertikale dhe atë horizontale.

2.Kontrolloni gjithmonë mjetin përpara se të niseni.

3.Respektoni shpejtësinë e lejuar edhe nëse është e nevojshme ngadalësoni shpejtësinë.

4.Vendosni gjithmonë rripin e sigurimit.

5.Mos i mbani fëmijët në sendiljen përpara apo në krahë.

6.Fëmijët i vendosni me rripat e sigurimit në sendiljet përkatëse.

7.Nëse udhëtoni natën, sapo të keni shenjat e para të gjumit, ndaloni dhe pushoni.

8.Mos parakaloni në zonat urbane.

9.Nëse shikoni një makinë që ka ndaluar ose që ngadalëson shpejtësinë, duhet ta bëni edhe ju, pasi mund të ketë këmbësor duke kaluar.

10.Qytetarë edhe nëse jeni në vijat e bardha, sigurohuni që drejtuesi i mjetit t’ju ketë parë.

11.Ju drejtues të biçikletave dhe motorrëve përdorni gjithmonë kaskat mbrojtëse si edhe sigurohuni që drejtuesi i mjetit t’ju ketë parë.

12.Mos drejtoni automjetet nëse keni konsumuar pije alkoolike apo lëndë narkotike.

13.Mos drejtoni autumjetet nëse keni marrë ndonjë qetësues.

Qendra Kombëtare e Urgjencës Mjekësore bën të mundur kontrollin dhe monitorimin në kohë reale në të gjithë territorin e Republikës së Shqipërisë.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm