Italia pritet të dërgojë emigrantët e parë në Shqipëri, teksa qendrat e azilit nuk kanë përfunduar ende

Emigrantët që kapen në det ndërsa përpiqen të arrijnë në Itali mund të transportohen në Shqipëri nga muaji i ardhshëm, ndërsa kërkesat e tyre për azil janë duke u përpunuar, shkruan Euronews.

Duke folur gjatë një vizite në Shqipëri në qershor, kryeministrja italiane Giorgia Meloni tha se dy qendrat e krijuara për të strehuar emigrantët do të jenë gati për të pritur 1000 personat e parë deri më 1 gusht.

Por, edhe pse afatit po i vjen fundi, në njërën prej qendrave vijon ndërtimi intensiv, ccka e bën të pamundur që të jetë plotësisht gati në kohë për të pritur emigrantët që do të dërgojë Italia.

As Italia dhe as Shqipëria nuk kanë treguar se kur ka të ngjarë të mbërrijnë emigrantët e parë.

Marrëveshja pritet të zgjasë për pesë vjet dhe parashikon strehimin e deri në 3,000 emigrantëve të marrë nga roja bregdetare italiane në ujërat ndërkombëtare çdo muaj.

Ajo u nënshkrua nga Meloni dhe homologu i saj shqiptar Edi Rama nëntorin e kaluar.

Emigrantët fillimisht do të kontrollohen në bordin e anijeve që i shpëtojnë në det, përpara se të dërgohen në Shqipëri për kontroll shtesë. Qendrat do të strehojnë vetëm burra të rritur, sipas ambasadorit të Italisë në Shqipëri Fabrizio Bucci.

Njerëzit që konsiderohen të pambrojtur – gra, fëmijë, të moshuar dhe ata që janë të sëmurë ose viktima të torturës – do të strehohen në Itali.

Familjet gjithashtu nuk do të ndahen. Ata që dërgohen në Shqipëri do të ruajnë të drejtën e tyre sipas ligjit ndërkombëtar dhe të Bashkimit Evropian për të aplikuar për azil në Itali dhe për t'u trajtuar kërkesat e tyre atje.

Me çdo kërkesë që kërkon rreth një muaj për t'u përpunuar, numri i njerëzve të dërguar në Shqipëri mund të arrijë në 36,000 në një vit.

Marrëveshja është kritikuar nga grupet e të drejtave të njeriut si një precedent i rrezikshëm.

Në fillim të këtij viti, Komiteti Ndërkombëtar i Shpëtimit e përshkroi marrëveshjen si "të kushtueshme, mizore dhe kundërproduktive" dhe së fundi, ai i kërkoi BE-së dhe vendeve të saj anëtare të mos përdorin "këtë model të rrezikshëm si një plan".

Dy qendrat në Shqipëri do t'i kushtojnë Italisë 670 milionë euro gjatë pesë viteve.

Kostoja e dërgimit të 36 mijë emigrantëve në Itali është 136 milionë euro, pothuajse e njëjtë me shumën që do të shpenzohet në Shqipëri, sipas Melonit.

Ambientet do të drejtohen plotësisht nga Italia dhe të dyja qendrat janë nën juridiksionin italian, ndërsa rojet shqiptare do të ofrojnë siguri të jashtme.