Alarmi i zjarreve në vend, 6 vatra ende aktive, si paraqitet situata deri tani

Situata me zjarret në Shqipëri vijon të jetë shqetësuese. Vetëm gjatë 24 orëve të fundit, janë regjistruar plot 24 vatra zjarri në disa zona të vendit, ndërsa 6 prej tyre vazhdojnë të jenë aktive, duke përfshirë sipërfaqe me bimësi, pyje dhe madje edhe banesa.

Sipas të dhënave zyrtare të Ministrisë së Mbrojtjes, zjarret janë përhapur në bashkitë: Elbasan, Finiq, Delvinë, Selenicë, Vlorë, Tiranë, Vorë, Krujë, Has, Mat, Malësi e Madhe, Kurbin, Korçë, Poliçan dhe Gjirokastër.

Ndërkohë 6 vatrat aktive janë në:

Elbasan – Në fushën e mbetjeve urbane, ku prej ditësh vijon ndërhyrja me inerte dhe kapsulim të mbetjeve. Një grup ekspertësh po monitoron ndotjen e ajrit, ndërsa forcat zjarrfikëse dhe mjetet e rënda vijojnë punën për izolimin e plotë të flakëve.

Finiq – Në zonën midis fshatrave Grazhdan dhe Malçan. Intensiteti i zjarrit ka rënë, por situata monitorohet nga afër nga zjarrfikësit dhe Shërbimi Pyjor.

Vlorë – Në zonën “Sotiran”, ndërmjet fshatrave Tragjas dhe Dukat, zjarri ka përfshirë shkurre dhe bimësi të ulët. Ekipet zjarrfikëse të bashkisë Vlorë janë në terren duke punuar për shuarjen e flakëve.

Tiranë – Në fshatin Bulticë, njësia administrative Vaqarr. Terreni i vështirë pengon ndërhyrjen me mjete zjarrfikëse, por forcat e emergjencës dhe 40 trupa të Forcave të Armatosura po vijojnë operacionin në terren.

Has – Në zonën malore mes fshatrave Gjinaj dhe Domaj, ku po digjet një sipërfaqe me pyje pishe. Era dhe terreni malor e bëjnë të vështirë ndërhyrjen.

Poliçan – Në fshatin Zgërbonjë, ku zjarri ka përfshirë shkurre dhe ferra. Në operacion janë përfshirë zjarrfikësit me 2 mjete zjarrfikëse dhe 7 efektivë.

Sakaq bëhet me dije se zjarret kanë shkaktuar dëme materiale dhe ndërhyrje masive. Deri më tani në total, janë djegur rreth 7 hektarë sipërfaqe me shkurre dhe bimësi të ulët, ndërsa në tre raste, flakët kanë përfshirë edhe banesa, por fatmirësisht pa pasoja në njerëz.

Ndëkohë, Instituti i Gjeoshkencave njofton se sot priten reshje të dobëta lokale, por rreziku nga zjarret mbetet i lartë në pjesën më të madhe të vendit. Në qarqet Durrës, Korçë dhe Vlorë, rreziku parashikohet i moderuar, por në disa zona specifike mund të shkojë sërish në nivel të lartë, sidomos në jug të Durrësit, në qendrën e Korçës dhe veri-qendër të Vlorës.

Strukturat e Mbrojtjes Civile u bëjnë thirrje qytetarëve, të shmangin ndezjen e zjarreve në ambiente të hapura, të tregojnë kujdes maksimal në zonat me rrezik dhe të njoftojnë menjëherë shërbimet zjarrfikëse ose autoritetet në rast të zbulimit të vatrave zjarri.