Aliu, “kalë troje” i Ramës në qeverinë Kurti? Prapaskena politike e 'Portit të Durrësit'

Emërimi i ish-ministrit të Albin Kurtit, Liburn Aliu në postin e drejtorit të Portit të Durrësit ka shkaktuar reagime të shumta në rrjet.

Lajmi u konfirmua paraditen e kësaj të marte nga zv/kryeministrja Belinda Balluku e cila e prezantoi Aliun si një person që sipas saj e ka parë Kosovën dhe Shqipërinë si një treg të përbashkët për zhvillimin ekonomik.

Ministrja tha se Aliu ishte një propozim i përshtatshëm, dhe pasi kërkesa u dërgua tek kryeministri, ai e pranoi emërimin.

Por duket se ky emërim ka më shumë prapavijë politike se sa profesionale.

Sipas gazetarit Gazmend Saiti, ky emërim është një përpjekjeje e kryeministrit Rama, për të pasur qasje më të thellë në informacionet që lidhen me qeverisjen e Albin Kurtit.

Gjatë një intervistë për “Kosova Live” Saiti thotë se Aliu ka qenë personi kyç që ka pasur marrëdhënie të drejtpërdrejta me Serbinë në kuadër të qeverisë së Kurtit, ndaj dhe Rama ka zgjedhur emërimin e tij.

“Tentativa ka qenë gjithmonë e vazhdueshme nga ana e Ramës për të marrë sa më shumë informacione në lidhje me qeverisjen e Albin Kurtit. Në rastin konkret me Liburn Aliun, ndoshta nuk do të ketë shumë informacione, por nga disa burime thuhet se ai ka qenë personi kyç që ka pasur marrëdhënie të drejtpërdrejta me Serbinë në kuadër të qeverisë së Kurtit,” ka deklaruar Saiti.

Sipas tij, për Ramën kjo është një mënyrë për të qenë më i informuar dhe për të ruajtur ndikim rajonal, përfshirë edhe përmes figurave që kanë qenë pjesë e afërt e qeverisë së Kosovës.

“Njëjtë siç veproi më herët me rastin e Vlorë Hysenit, tani po ndodh e njëjta gjë me Liburn Aliun,” ka shtuar Saiti, duke theksuar se emërimi i tij në Portin e Durrësit ka karakter politik.

 “Pozita kishte një drejtor aktual. Ndryshimi është bërë vetëm për ta goditur politikisht kryeministrin Albin Kurti,” tha ai.

Po kush është Liburn Aliu dhe si erdhi dorëheqja e tij nga posti i ministrit?

Liburn Aliu është njëri nga themeluesit e Vetëvendosjes dhe për shumë vjet një nga njerëzit më të afërt të Albin Kurtit, kryetarit të LVV-së dhe kryeministrit në detyrë të Qeverisë së Kosovës.

Ai shërbeu për më shumë se katër vjet si ministër i Infrastrukturës në Qeverinë "Kurti 2" për të dhënë më pas dorëheqjen nga posti më 27 gusht të këtij viti. 

Ai shpjegoi se dorëheqja e tij erdhi pasi bashkëpartiaku i tij, Dimal Basha, u zgjodh kryetar i Kuvendit të Kosovës. Aliu tregoi se e kishte njoftuar kryeministrin në detyrë, Albin Kurti, për vendimin e tij menjëherë pas zgjedhjes së Bashës në krye të Kuvendit. 

I konsideruar si një nga njerëzit më të afërt të Kurtit, emërimi i tij në Portin e Durrësit është parë si një lëvizje strategjike e Ramës me prapaskenë politike, nisur dhe nga relatat mjaft të afërta që kreu i qeverisë tonë ka me Vuçiç.