Emigrantët/ Deputeti britanik ‘bën për një lek’ ambasadorin shqiptar, Qirjako justifikohet me gjuhën e Ramës

Ambasadori shqiptar në Britaninë e Madhe, Qirjako Qirko, ka marrë pjesë në seancën e Komisionit të Punëve të Brendshme, ku është diskutuar edhe çështja e emigrantëve ilegalë shqiptarë.

Qirko i është shmangur disa herë pyetjeve rreth mbërritjes së emigrantëve në mënyrë ilegalë dhe përgjegjësisë që qeveria shqiptare duhet të mbajë lidhur me largimin masiv të tyre nga vendi i lindjes.

Megjithatë, edhe ai sikurse kryeministri Rama ka fajësuar britanikët duke kërkuar që t’i japin fund diskriminimit të popullsisë shqiptare në Britani.

“Do të doja të përfitoj nga ky rast për të kërkuar që kjo fushatë diskriminimi ndaj qytetarëve shqiptarë që jetojnë këtu në Britani të Madhe, duhet të ndalet”, i tha ai komitetit, “sidomos në pjesë të mediave që përfshihen në këtë valë aktiviteti kundër njerëzve të mi që jetojnë këtu.”

I pyetur nga anëtari i komisionit dhe deputeti konservator Tim Loughton se pse është rritur kaq shumë numri i shqiptarëve që kalojnë Kanalin këtë vit, Qirko ka thënë “ambasada ime, qeveria ime nuk kanë asnjë informacion në lidhje me këtë numër”.

Ambasadori këmbënguli se Shqipëria është një vend i sigurt duke deklaruar se njerëzit që mbërrijnë në Britani ilegalisht pretendojnë të jenë viktima të skllavërisë modern, deklaratë të cilët e ka bërë kohë më parë Sekretarja e Brendshme Suella Braverman.

Qirko u pyet nëse mendonte se të gjithë shqiptarët që mbërrinin në Angli pretendonin ose shtireshin si viktima, por ambasadori nuk e kishte një përgjigje.

Në fjalën e tij ai tha se do të ishte i lumtur të shihte njerëzit që mbërrijnë ilegalisht në Britani, të ktheheshin mbrapsht në Shqipëri. Ai pranoi se pajtohet me Britaninë e Madhe që nuk duhet të njohë asnjë kërkesë për azil nga shtetasit shqiptarë.

“I takon autoriteteve britanike të vendosin”, duke shtuar “unë nuk mund ta diskutoj këtë çështje sepse nuk është problemi im. Ajo që mund të them është se Shqipëria është një vend i sigurt.”

I pyetur sërish nëse qeveria shqiptare do të kishte problem nëse kjo do të bëhej politikë e Mbretërisë së Bashkuar, Qirko sërish ‘u shtang’. “Nuk dua të komentoj, nuk më lejohet të komentoj”, tha ai në komision.

“Ju jeni këtu si përfaqësues i qeverisë shqiptare. Unë thjesht po bëj një pyetje të arsyeshme se cila do të ishte përgjigja e qeverisë shqiptare, sepse kjo është çelësi nëse qeveria e Mbretërisë së Bashkuar do ta miratojë atë politikë apo jo”, i ka thënë Loughton.

I pyetur nëse duhet të jepte ose jo një kontribut financiar qeveria shqiptare për strehimin e emigrantëve në hotelet e Britanisë, Qirjako tha se nuk ishte përgjegjësi e qeverisë shqiptare.

Ai shtoi se qeveria shqiptare “nuk mund të kontrollojë TikTok ose Facebook” kur u pyet se çfarë veprimi po ndërmerret për mbylljen e postimeve në mediat sociale që reklamojnë kalimet e kanaleve.

Ambasadori tha se policia shqiptare mund të jetë duke i hetuar rastet, por sërish u gjet i papërgatitur duke thënë se nuk kishte detaje mbi këtë.