Amullia me recetat/ Jo ilaçe me rimbursime pa kryer tamponin! Vonesa disa ditore e përgjigjes nxjerr jashtë loje skemën

Edhe kur gjenden përpara një pacienti që referon simptomat e COVID-19, mjekët e familjes kanë urdhër të mos lëshojnë recetë për rimbursimin e ilaçeve pa parë më parë përgjigjen e tamponit.

Deri këtu duket në rregull, por shqetësimi që kanë shumë pacientë, bashkë me ta edhe profesionistë shëndetësie, është fakti që përgjigjja e testit nuk mund të merret sot për nesër, duhen të paktën 3 ditë. Një fakt ky i pranuar edhe nga Ministria e Shëndetësisë, e cila e ka justifikuar vonesën me fluksin e tamponëve, gjë që sipas autoriteteve dikton prioritizim të rasteve. Por kjo vonesë disaditore, përveçse mund të vërë në rrezik jetën e pacientit, nxjerrë jashtë loje skemën për rimbursimin e ilaçeve.

DENONCIMI

Duke marrë shkas nga një denoncim i bërë në redaksi, gazeta Panorama kontaktoi me mjekë të shërbimit parësore dhe farmacistë në kryeqytet. Edhe pse po bëhet një javë nga miratimi i skemës për rimbursimin e paketës së barnave për pacientët që janë me simptoma të lehta dhe të mesme, si mjekët dhe farmacistët shprehen të paqartë me mënyrën se si do të operojnë. Referuar rastit të mësipërm, pacienti me simptomat e COVID ka telefonuar fillimisht Shërbimin e Urgjencës Kombëtare, i cili e ka adresuar te mjeku i familjes.

Pas kontaktit me këtë të fundit, mjeku ka lëshuar recetën. Por edhe pse trajtimi është bërë sipas udhëzuesit të Ministrisë së Shëndetësisë për mjekimin e rasteve me COVID-19 (me antibiotikë dhe vitamina), rasti nuk është përfshirë në skemën e rimbursimit.

Ne kontaktuan me mjeken e familjes, e cila na tha se për të përfituar duhet përgjigjja e tamponit. Por për këtë pacientit do t’i duhej të priste minimalisht edhe 3 ditë të tjera, por kjo mund të sjellë përkeqësim të gjendjes shëndetësore. I gjendur në këto kushte, pacienti është detyruar të blejë ilaçet me çmim tregu.

FARMACISTËT

Kujtojmë që një ditë pas miratimit në qeveri, vendimi për rimbursimin e paktës së barnave për pacientët me COVID-19 u botua në Fletoren Zyrtare, por i pashoqëruar nga lista zyrtare e medikamenteve që do të jenë pjesë e skemës. Edhe sot farmacistët ankohen se nuk kanë ende një listë të ilaçeve. Ajo që dinë është ajo që kanë dëgjuar se vlera totale e rimbursimit do të jetë jo më shumë se 125 dollarë. Nga Ministria u sqarua më herët se pas kontaktit me mjekun e familjes receta do të lëshohet elektronikisht dhe tërheqja e barnave mund të bëhet në farmaci me kodin përkatës.

“Paketa e mjekimit bazë përmban vitaminoterapi, antipiretikët, antibiotikët, antikoagulantët dhe kortizonikët, por është mjeku i familjes ai që përcakton se çfarë mjekimi duhet të marrë pacienti i diagnostikuar me COVID-19”, ka bërë me dije Ministria.

Për format e lehta, ku trajtimi përfshin vitamina, shurup për kollën apo edhe trisol, mbulimi financiar apo vlera që do të rimbursohet do të jetë deri në 1650 lekë. Ndërsa për të infektuarit që janë në stadin e dytë, pra kur vërehet pneumoni, mbështetja financiare do të jetë deri në 10 900 lekë.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm