Mediat ndërkombëtare jehonë arrestimit të ish zyrtarit të FBI-së: Kishte marrëdhënie të vazhdueshme me Edi Ramën

Arrestimi i ish-zyrtarit të lartë të FBI-së, Charles McGonigal, ka bërë jehonë në mediat ndërkombëtare. McGonigal përballet me dy akuza në Shtetet e Bashkuara të Amerikës, ku njëra prej tyre lidhet me marrjen e parave nga një oligark rus për të fshirë emrin e tij nga lista e sanksioneve të Shteteve të Bashkuara, ndërsa tjetra lidhet me vizitat e tij në Shqipëri dhe marrjen e një sasie parash prej 225 mijë euro nga një punonjës i shërbimit informativ shtetëror.

Sipas mediave botërore ai ka pasur takime edhe me kryeministrin Edi Rama.

"Prokurorët thonë se ai gjithashtu mori 225 mijë dollarë ryshfet nga spiuni shqiptar dhe pati një takim të fshehtë me kryeministrin e vendit,"- shkruan britanikja Daily Mail.

"McGonigal nuk i zbuloi FBI-së marrëdhënien e tij me ish-punonjësin e inteligjencës shqiptare, i përshkruar si “Personi A” në dokumentet e akuzës. Ai gjithashtu dyshohet se nuk zbuloi se kishte një "marrëdhënie të vazhdueshme me Kryeministrin e Shqipërisë", thuhej në aktakuzë. Që nga viti 2013, Edi Rama është kryeministër i këtij vendi,"- shkruan ndër të tjera Washington Post.

"Në një takim, prokurorët pretendojnë se McGonigal i kërkoi kryeministrit të Shqipërisë që të jetë “i kujdesshëm në lidhje me dhënien e licencave për shpimin e fushës së naftës në Shqipëri për kompanitë ruse të frontit”. Ish-punonjësi i inteligjencës shqiptare që i pagoi 225 mijë dollarë kishte interes financiar në vendimin e qeverisë për kontratat,"- shkruan CNN.

"Ndërsa bënte udhëtime në Evropë, McGonigal thuhet se nuk kishte raportuar burrin e Nju Xhersit si shoqëruesin e tij të udhëtimit, karakterizoi në mënyrë të rreme qëllimin e udhëtimit dhe raportoi gabimisht se nuk do të kishte "kontakte të huaja të raportueshme në udhëtim". Zyrtari i lartë i FBI-së në atë kohë u takua me një shtetas shqiptar, i cili ishte i punësuar nga një konglomerat energjetik kinez dhe operonte si këshilltar jozyrtar i Kryeministrit të Shqipërisë, duke mbajtur një llogari zyrtare emaili dhe pasaportë të qeverisë shqiptare,"- vijon më tej Fox News.