Arrestohet në Dubai kreu i mafies shqiptare, narkos që trazoi politikën e Ekuadorit

Arrestohet në Dubai kreu i bandës shqiptare të trafikut të dr*gës në Ekuador, Dritan Gjika. 

Lajmin e ka bërë të ditur ministria e Brendshme e Ekuadorit, në një postimi në X ku shkruan se arrestimi i Gjikës u bë gjatë një operacioni ndërkombëtar të zhvilluar sot (26 maj).

Ai ishte në kërkim ndërkombëtar nga Interpol për trafik droge, pastrim parash dhe krim të organizuar.

Kush është Dritan Gjika

Gjika u bë një nga trafikantët më të shquar shqiptarë në trafikun e drogës në Ekuador vitet e fundit. E teksa një pjesë e madhe e rrjetit të tij ka dalë tashmë në sipërfaqe.

Gjika shkoi për herë të parë në Ekuador në nëntor të vitit 2009, kur ishte 33 vjeç. Në vitin 2013, atij iu dha shtetësia dhe u vendos në Guayaquil, zemra ekonomike e Ekuadorit. Aty filloi të ndërtonte perandorinë e tij të trafikut të drogës. Ai ishte një nga trafikantët e parë shqiptarë që hapi dyqan në Ekuador, duke u paraqitur si biznesmen.

Gjika dhe një tjetër shqiptar blenë një kompani eksporti të quajtur “Cresmark S.A.” në vitin 2014 dhe Gjika u emërua si menaxher i përgjithshëm. Në të njëjtin vit, ai hapi një kompani ndërtimi së bashku me biznesmenin ekuadorian Rubén Cherres.

Cherres nuk ishte i panjohur për forcat e zbatimin e ligjit. Në vitin 1999, ai ishte arrestuar me akuzën e trafikut të drogës pasi një bastisje e policisë çoi në sekuestrimin e 108 pakove me kokainë. Ai u shpall i pafajshëm një vit më pas pasi disa figura me ndikim dhanë dëshmi që kërkonin lirimin e tij, duke përfshirë Danilo Carrera, kunati i presidentit të atëhershëm të Ekuadorit, Guillermo Lasso.

Përveç lidhjeve të tij me politikën, Cherres ishte gjithashtu i lidhur mirë me biznesin dhe elitat politike të Ekuadorit, duke e bërë atë një aleat të fuqishëm për skemën e trafikut të drogës të Gjikës.

Megjithëse është e paqartë saktësisht se kur Gjika filloi të trafikonte kokainë në Evropë, është e qartë se ai ishte në vendin e duhur kur në Kolumbinë fqinje, qeveria dhe Forcat e Armatosura Revolucionare të Kolumbisë (Fuerzas Armadas Revolucionarias de Colombia – FARC) nënshkruan një marrëveshje historike të paqes në 2016-ën. Kur FARC u çmobilizua në 2017-ën, disidentët e Frontit të 48-të të FARC mbajtën armët dhe territoret e tyre në kufirin Kolumbi – Ekuador. Në mungesë të kontakteve me blerësit ndërkombëtarë, ata krijuan një aleancë me “Constru”, një rrjet trafiku droge që dominonte rrugët për në Sucumbíos, një provincë e Ekuadorit. “Constru” lidhi mbetjet e FARC me blerës ndërkombëtarë, shumë prej tyre nga Ballkani, përfshirë edhe Gjikën.

Sipas policisë ekuadoriane dhe spanjolle, organizata e Gjikës fillimisht trafikonte kokainë në pako prej qindra kilogramësh në kontejnerë që i përkisnin kompanisë së Gjikës ose kompanive të tjera bashkëpunëtore. Në vitin 2018, Gjika me sa duket u përpoq të rriste biznesin e tij. Ai bleu aksione në një kompani të dytë eksporti, “Agricomtrade”, e cila dërgonte banane në kompani të ndryshme evropiane.
Një prej tyre, importuesi shqiptar Alba Exotic Fruit, është përdorur për të importuar kokainë në Shqipëri, sipas prokurorisë shqiptare. Në total, “Agricomtrade” dërgoi më shumë se 150 dërgesa nëpërmjet Alba Exotic Fruit.

Gjika dyshohet se ka punuar me disa koordinatorë që mbikëqyrnin ngritjen e kompanive dhe rekrutimin e zyrtarëve publikë.

Sipas raportimeve të policisë spanjolle, organizata e kishte burimin e kokainës nga një furnizues në Kolumbi, i cili dorëzonte 4 tonë drogë çdo muaj në qendrat e ruajtjes në Ekuador. Pagesat për dërgesat e kokainës depozitoheshin duke përdorur llogari bankare që i përkisnin një anëtari të rrjetit të Gjikës, sipas prokurorëve ekuadorianë. Pasi kokaina mbërrinte në Ekuador, nënkontraktorët ekuadorianë merreshin me magazinimin dhe transportin. Organizata e Gjikës i paguante këta nënkontraktorë me kokainë.

Në një ditë të vetme në qershor 2021, Gjika dhe Cherres themeluan 8 kompani, shumica në sektorin e ndërtimit. Që atëherë, 6 prej tyre janë nën hetim për pastrim parash. Midis viteve 2015 dhe 2024, organizata ka pastruar të paktën 31 milionë dollarë përmes këtyre kompanive dhe të tjerave, sipas prokurorit publik të Ekuadorit.

Megjithatë, në mesin e vitit 2021, policia kundër narkotikëve e Ekuadorit nisi një hetim që identifikoi Gjikën si kreun e një skeme trafiku kokaine që përfshinte Cherres dhe biznesmenë të tjerë ekuadorianë.Gjika u vu nën një vëzhgim gjithnjë e më të madh në fillim të vitit 2023, kur një mori raportimesh mediatike përmendën emrin e tij për lidhje me një skemë korrupsioni të nivelit të lartë.