ARRSH dominon tenderët më të shtrenjtë, Milot–Balldren kryeson listën e PPP-ve

Shpenzimet më të mëdha përmes prokurimeve publike në vitin 2025 janë përqendruar te rrugët, koncesionet dhe blerjet e përqendruara.

Sipas të dhënave të marra nga monitorimi i AIS/Open Procurement Albania mbi tenderimet publike në Shqipër, është bërë një renditje e 10 tenderëve më të shtrenjtë të mbajtur nga Autoritetet Prokuruese gjatë vitit 2025.

Milot–Balldren, tenderi më i shtrenjtë i vitit

Tenderi me vlerën më të lartë të shpallur për 2025 është një procedurë koncesionare/PPP dhe koncesion, e cila ende nuk është finalizuar me fitues. Bëhet fjalë për procedurën: “Për dhënien me koncesion të segmentit për projektimin, ndërtimin, financimin, operimin, mirëmbajtjen, rehabilitimin dhe transferimin e segmentit rrugor Milot–Balldren”.

Ky prokurim koncesionar mbahet nga Ministria e Infrastrukturës dhe Energjetikës dhe ka vlerë koncesioni prej 364,732,924 euro për një afat kontrate 35-vjeçar. Tenderi është njoftuar më datë 11 gusht 2025 dhe ende nuk ka pasur një finalizim të procedurës.

Kjo PPP përfaqëson jo vetëm tenderin më të shtrenjtë të vitit 2025, por edhe një nga kontratat më afatgjata që rëndon mbi financat publike për dekadat në vijim.

Rrugët “hanë” buxhetin: ARRSH dominon listën

Autoriteti Rrugor Shqiptar dominon listën e 10 tenderëve më të shtrenjtë, me 4 të tillë. Konkretisht, bëhet fjalë për 4 procedura të kryera nga ARRSH:

Ndërtimi i Rrugës Kashar–Nyja Vaqarr, Faza 1, fituar nga Shoqëria 4 A-M, me vlerë oferte fituese pa TVSH prej 2.63 miliard lekësh.

Ndërtimi i Rrugës Kashar–Nyja Vaqarr, Faza 2, fituar nga Elmazaj Konstruksion dhe INC S.P.A, me vlerë oferte fituese pa TVSH prej 2.27 miliard lekësh.

Zgjerimi i Superstradës Tiranë–Durrës, Faza III, fituar nga ALB-Building, me vlerë oferte fituese pa TVSH prej 1.97 miliard lekësh. 

Ndërtimi i By-Pass Sarandë, Faza 1, fituar nga Gjoka Konstruksion, me vlerë oferte fituese pa TVSH prej 1.76 miliard lekësh.

Ky dominim i ARRSH-së në listën e tenderëve më të shtrenjtë vjen në një kohë kur institucioni është vendosur në qendër të skandalit të zbuluar nga dosja hetimore e SPAK, pas përgjimeve të zbardhura mes ish-zëvendëskryeministres dhe ministres së Infrastrukturës, Belinda Balluku, dhe ish-drejtorit Evis Berberi.

Në këto komunikime, Balluku jep udhëzime të drejtpërdrejta mbi anulimin, afatet dhe rishpalljen e tenderëve, ndërsa Berberi raporton për zbatimin e tyre — një skandal që ka çuar në marrjen e Ballukut si e pandehur dhe ka ngritur dyshime serioze mbi mënyrën se si janë menaxhuar fondet dhe procedurat publike.