Balkan Insight: nga Samir Mane te Kastrati, hyrja në media e ‘oligarkëve’

Gjergj Erebara*

Biznesmeni i fuqishëm, i lidhur politikisht, Shefqet Kastrati, ka hyrë në tregun e mbingopur mediatik të Shqipërisë me blerjen të hënën të Euronews Albania, duke ndjekur hapat e Samir Manes, i cili bleu TV SCAN muajin e kaluar.

Balfin Group, 100 për qind në pronësi të Manes, bleu TV SCAN në mars për 700,000 euro. TV SCAN është një operator i vogël, që kontrollon vetëm 2.9 për qind të tregut të reklamave televizive në vitin 2020, sipas të dhënave financiare të analizuara nga BIRN. Në fund të atij viti, TV SCAN kishte grumbulluar humbje prej rreth 470,000 euro.

Mane ka interesa biznesi në një gamë të gjerë sektorësh, nga ushqimi dhe veshmbathja tek energjia elektrike, mineralet, ndërtimi dhe turizmi.

Të hënën, Grupi Kastrati tha se kishte blerë 60 për qind të aksioneve në Intermedia Group, që zotëron Euronews Albania, për një shumë të pazbuluar. Ajo njoftoi planet për t'u zgjeruar në Kosovë dhe Maqedoninë e Veriut.

Euronews Albania u themelua në vitin 2019 nën një marrëveshje ekskluziviteti me Euronews, rrjeti europian i lajmeve në pronësi të një kompanie portugeze e lidhur me rrethin familjar të kryeministrit hungarez Viktor Orban.

Kastrati ka interesa në karburant, ndërtim, turizëm dhe sigurime, përveç zotërimit të firmave koncesionare që operojnë autostradën që lidh Shqipërinë me Kosovën dhe Aeroportin Ndërkombëtar të Tiranës.

Euronews u fut në Shqipëri, duke raportuar të ardhura prej rreth 214 milionë lekësh, afërsisht 1.8 milionë euro, në vitin 2020 ose rreth 5.3 për qind të tregut. Ajo akumuloi rreth 59 milionë lekë humbje, megjithatë, gjatë dy viteve të para të veprimtarisë, duke konsumuar rreth 60 për qind të kapitalit të nënshkruar.

Tregu televiziv shqiptar dominohet nga Klan dhe Top Channel, dy operatorët kryesorë me të ardhura të kombinuara që zënë rreth 63 për qind të xhiros totale të tregut.

Tregu, megjithatë, është larg të qenit transparent.

Të hënën, Departamenti Amerikan i Thesarit sanksionoi Ylli Ndroqin, një pronar mediash në Shqipëri, për përdorimin e mediave më parë nën kontrollin e tij për të “zhvatur dhe shantazhuar qytetarët shqiptarë nëpërmjet kërkesave për para dhe blerjeve reklamuese në këmbim të ndalimit të publikimit të historive negative në media”.

Në fillim të këtij muaji, një mosmarrëveshje administrative brenda Top Channel, operatori kryesor në vend, shkaktoi një luftë fjalësh mes menaxhmentit dhe drejtorit të shkarkuar së fundmi të një emisioni të madh, ku secili akuzonte tjetrin për shantazh dhe korrupsion.

*Titulli është i Politiko