Berisha merr vulën e PD, Fuga: Vendim që anulon dy vjet histori politike

Akademiku Artan Fuga ka komentuar vendimin e fundit të Gjykatës së Apelit e cila i dha vulën dhe logon Sali Berishës.

Në një postim në Facebook, Fuga shkruan se vendimi i Apelit rrëzon çdo vendim që është marrë në këto dy vite, kur Kuvendi i mohonte PD-së statutin zyrtar e kur fondet shkonin për Lulzim Bashës.

Fuga ngre disa pyetje, por ajo çka në fund thekson është se vendimi i Gjykatës së Apelit anuloi dy vite histori politike, përgjatë të cilave politika ka marrë rolin e gjykatës dhe Kuvendi ka vendosur pa baza juridike.

Postimi:

Njoftohet se gjykata e apelit ja la vulën dhe logon zyrtare Partisë Demokratike që drejton z. Sali Berisha.

Ky vendim rrëzon gjithçka që ka ndodhur në politikë, në Komisionin Qendror Zgjedhor, në Kuvendin e Shqipërisë, në komisionet e Kuvendit, në buxhetin e shtetit për financimin e partive, në këta dy vjet!

Kjo më jep të drejtën të bëj disa pyetje:

Je apo nuk je me atë parti, kaq idiot duhet të jesh sa të mendoje që vula dhe logua nuk i takonte? Cfardo qofsh gjoja gazetar, analist, deputet, ministër, llapaqen, llapaqene, etj?

Cfarë do të bëhet tani me ato vendime politike të Kuvendit të Shqipërisë që e përjashtonin këtë parti nga statuti zyrtar i partisë? Kush i paguan dëmshpërblimet?

A do të përsëriten zgjedhjet lokale dhe të përgjithshme meqë vula dhe logua zyrtare nuk i takonte partisë të z. Lulzim Basha? (sipas vendimeve të gjyqit)

A do të shpërndahet Kuvendi i Shqipërisë meqë zgjedhjet janë bërë mbi baza juridike që gjykata i hodhi poshtë?

Cfarë do të bëhet tani, a do ta përjashtojë nga partia demokratike që ka vulën dhe logon z. Basha, dhe bashkëpuntorët e tij, në qendër dhe në rrethe?

Po paratë e dhëna për fushatën elektorale kujt do t'i takojnë? Apo ato kanë avulluar krejt?

Cfarë nuk po na shohin sytë ne qytetarëve ? Politika bëhet gjykatë, Kuvendi merr vendime pa referenca juridike, gjykata merr vendime që anullon dy vjet histori politike!

Kjo nuk është tragjike.

Kjo është qesharake, jeta jonë politike është qesharake, në kufijtë e absurdit dhe të tragjedisë kombëtare!