Berisha reagon për takimin e një grupi demokratësh: PD është partia më e hapur, mendimi ndryshe është normal

Një takim i disa figurave të Partisë Demokratike në një kafe ka marrë vëmendjen e mediave.

Kreu i PD-së, Sali Berisha, në një prononcim për News24, u shpreh se ngjarje të tilla nuk përbëjnë lajm dhe se brenda partisë mendimi i lirë është i natyrshëm.

“Takimet në kafe nuk meritojnë komente,” u shpreh Berisha, duke theksuar se PD “është partia më e hapur dhe demokratike e këtij vendi për çdo lloj mendimi e ideje”.

I pyetur mbi diskutimet se procesi i analizës së brendshme brenda PD-së nuk ka nisur ende, Berisha tha të kundërtën.

Sa i takon mundësisë që mendimet e tyre t’i paraqiten zyrtarisht, Berisha tha se secili prej tyre ka instancën ku duhet të shprehet.

Prononcimi për News24:

Osman Stafa, News24: Një lajm ka marrë vëmendjen e mediave, një grup demokratësh janë takuar në një kafe. Si e keni parë këtë takim të tyre.

Sali Berisha: Normalisht takimet në kafe nuk meritojnë komente, por PD është partia më e hapur dhe demokratike e këtij vendi për çdo lloj mendimi, ideje dhe kaq mund të them.

Osman Stafa, News24: Është diskutuar për PD dhe që ende nuk ka nisur procesi i analizës së brendshme.

Sali Berisha: Procesi i analizës së brendshme ka nisur, janë bërë gjithë udhëzimet. Kjo nuk përbën asnjë lajm dhe risi, thjesht mediat e përdorin këtë për të mbuluar superskandalet e Ramës dhe Lubisë. Diversitet mendimi në këtë parti ka pasur ka dhe do ketë sa kohë kjo të mbetet Parti Demokratike.

Osman Stafa, News24: Nuk ndiheni i shqetësuar nga ky takim, sepse janë njerëzit që kanë marrë më shumë vota.

Sali Berisha: Unë i shqetësuar? Jo, njerëzit që kanë marrë më shumë vota janë në Parlament.

Osman Stafa, News24: E kam fjalën për listat e hapura.

Sali Berisha: Për listat e hapura ata janë njerëz të nderuar, janë aktivistë të shquar të PD dhe njerëz me kontribute të pamohueshme në PD dhe është gjëja më normale mendimi ndryshe në parti.

Osman Stafa, News24: A do konsideroni mendimet e tyre nëse do vijnë të artikuluara në zyrën tuaj.

Sali Berisha. Kanë instancat secili. Ervin Salianji është anëtar i Kryesisë së PD dhe ka vendin ku t’i shprehë mendimet. Të tjerët janë, Alimehmeti është këshilltari i parë i opozitës në Tiranë.

Të gjithë kanë vendin ku të shprehin mendimet e tyre, unë pres çdo demokrat në zyrë, por janë të ftuar të shprehin mendimet e tyre gjithë demokratët, nuk ka asnjë lloj risie këtu, të jem i sinqertë.