Betohet drejtori i ri i Policisë së Shtetit/ Gledis Nano rendit prioritetet, ka një kërkesë për kolegët

Gledis Nano ka marrë zyrtarisht detyrën si Drejtor i Përgjithshëm i Policisë së Shtetit. Prezantimi i tij u bë nga ministri i Brendshëm Bledi Çuçi në praninë e ish-drejtorit Ardi Veli dhe kolegëve e përfaqësuesve të organizatave ndërkombëtare.

Në fjalimin e parë si drejtori i Policisë së Shtetit, Gledis Nano ka parashtruar pikat kyçe ku ai do të përqëndrohet për të përmirësuar dhe vijuar me punën në Policinë e Shtetit, si dhe për të rritur bashkëpunimin me qytetarët e vendit.

Nano i ka kërkuar kolegëve të tij në Policinë e Shtetit të përmbushin me angazhim maksinal detyrën funksionale sipas betimeve që kanë bërë.

FJALA E DREJTORIT TË PËRGJITHSHËM TË POLICISË SË SHTETIT DREJTUES MADHOR GLEDIS NANO

I nderuar zoti Ministër i Brendshëm,

Të nderuar drejtues të lartë të Policisë së Shtetit,

Të nderuar përfaqësues të OSBE-së, ICITAP-it dhe PAMECA-s

Të nderuar kolegë e qytetarë,

Besimi i detyrës së Drejtorit të Përgjithshëm të Policisë së Shtetit, përtej privilegjit, më ngarkon me përgjegjësinë për të qenë në lartësinë e detyrës në shërbim të qytetarëve dhe në nderim me përulje ndaj mundit, sakrificës dhe gjakut të derdhur nga çdo dëshmor i përjetësuar në yll në memorialin e kujtesës së Policisë së Shtetit.

Ndaj gjej rastin, së pari t’u shpreh një falënderim të posaçëm, Ministrit të Brendshëm dhe Kryeministrit të Shqipërisë, për besimin e dhënë në këtë detyrë të re, si Drejtor i Përgjithshëm i Policisë së Shtetit.

Profesioni im nuk ishte zgjedhje karriere, por pasion i frymëzuar nga babai im, ish-oficer policie. Në këto dy dekada në radhët e Policisë së Shtetit, nga pozicioni më i ulët e deri në detyra të larta, kam kuptuar se ky institucion është një pjesë kryesore e jetës sime, që kërkon angazhim dhe përkushtim të lartë në çdo detyrë.

Sfidat për policinë janë të shumëfishta, puna dhe rezultatet pozitive të arritura nga paraardhësi im z. Ardi Veliu kanë nevojë të çohen përpara.

Qytetarët presin nga Policia e Shtetit standarde të tjera reagimi dhe sjelljeje në zgjidhjen e problemeve të tyre. Dhe ne do të bëjmë maksimumin për t’ia arritur. Por në të njëjtën kohë, kërkoj prej tyre ta konsiderojnë Organizatën tonë si një partner. Roli i tyre është i pazëvendësueshëm në suksesin e punës tonë. Ndaj, do të jem gjithnjë inkurajues që bashkëpunimi qytetar-polici, sa të vijë e të forcohet edhe më shumë.

Gjithashtu, prioriteti im do të jetë intensifikimi i bashkëpunimit me të gjitha agjencitë ligjzbatuese në vend, partnerët ndërkombëtarë dhe misionet që asistojnë Policinë shqiptare.

Ne synojmë një polici më të trajnuar, me kapacitete të shtuara në fushën e dixhitalizimit, mirëmenaxhim të çdo burimi njerëzor bazuar në meritokraci, të cilat janë parakushtet për një hap cilësor, çka do ta rendiste shpejt Policinë shqiptare, cilësisht, krah policive evropiane.

Unë ju garantoj se me angazhimin tim maksimal do të vijoj më tej në çuarjen përpara të reformave në Policinë e Shtetit, duke synuar rritjen e aftësive profesionale dhe operacionale, në përmbushje të misionit kushtetues që ajo ka.

Nuk dua të ndalem më gjatë në këtë fjalë përshëndetëse, por në ditën e parë të detyrës time si Drejtor i Përgjithshëm i Policisë së Shtetit, dua të shfrytëzoj rastin e t’i uroj çdo kolegu suksese në përmbushjen e angazhimeve që burojnë nga respektimi i ligjit.

Të gjithë ne jemi betuar përpara flamurit ditën që kemi marrë detyrën, ndaj kërkoj angazhimin tuaj maksimal në realizimin e detyrave funksionale, sipas betimit, që të gjithë ne kemi bërë!

Edhe njëherë, ju faleminderit për besimin e dhënë!