Bileta e “play-off”, si mund të kualifikohet kombëtarja shqiptare

Fitorja historike ndaj Serbisë ka rritur ndjeshëm gjasat e Shqipërisë për të siguruar një vend në “play-off”-in e Botërorit. Kombëtarja kuqezi, pas triumfit në Leskovc, ka marrë një shtysë të fortë morale dhe tani e sheh veten në pozita më të favorshme se rivalët e drejtpërdrejtë.

Megjithatë, rruga drejt Botërorit mbetet e hapur dhe çdo gjë do të vendoset në nëntor, në dy sfidat e fundit të fazës kualifikuese. Shqipëria ka edhe dy ndeshje për të luajtur, ndërsa Serbia tre, për shkak se ka një ndeshje më pak të zhvilluar deri tani. Kjo e fundit mund të ndryshojë ndjeshëm ecurinë e grupit, ndaj asgjë nuk është përfundimtare.

Aktualisht, ekipi i Sylvinhos ndodhet në avantazh si në renditje ashtu edhe në formë, por për të ruajtur pozitat, duhet të konfirmojë suksesin edhe në ndeshjet e radhës.

Agjenda e Shqipërisë

13 nëntor – Andorrë – Shqipëri, ora 20:45

16 nëntor – Shqipëri – Angli, ora 18:00

Sfida ndaj Andorrës shihet si një mundësi e artë për të siguruar tri pikë jetike, ndërsa përballja me Anglinë në “Air Albania” pritet të jetë testi më i vështirë dhe vendimtar për fatin e Kombëtares në grup.

Agjenda e Serbisë

14 tetor – Andorrë – Serbi, ora 20:45

13 nëntor – Angli – Serbi, ora 20:45

16 nëntor – Serbi – Letoni, ora 18:00

Serbia do të përballet me një kalendar më të ngjeshur, por edhe më të vështirë në letër. Takimi në “Wembley” ndaj Anglisë mund të jetë vendimtar për të ardhmen e saj në grup, ndërsa dueli i fundit me Letoninë mund të përcaktojë renditjen përfundimtare.

Në këtë pikë të garës, çdo gol dhe çdo pikë mund të bëjë diferencën. Me shpirtin luftarak që tregoi ndaj Serbisë dhe mbështetjen e tifozëve, Shqipëria ka të gjitha mundësitë për të bërë historinë dhe për të mbajtur gjallë ëndrrën e Botërorit.