Flash News

Ceno Klosi me mbi 800 vota të vjedhura, Balluku gjen si arsye lodhjen e numëruesve

"Fast & Furious" në ish-Bllok, policia ndjek një Audi Q8, përplasen 4 makina

Makina përplas dy turistë me motoçikletë në Fushë Arrëz, humb jetën njëri prej tyre

Aksident i rëndë në Thumanë, një i vdekur, 3 të plagosur

Gjykata e Durrësit pezullon nga detyra drejtorin e Arsimit Parauniversitar

E-TJERA

BIRN: Komisionerët e vetingut vihen në radhë për një post në Kushtetuese

Politiko 13 Janar 2025, 16:05

BIRN: Komisionerët e vetingut vihen në radhë për një

Nga 13 kandidatë që garojnë për vendin e Holta Zaçajt në Gjykatën Kushtetuese, 8 prej tyre janë ish-komisionerë të shkallës së parë të vetingut dhe ish- anëtarë të organeve të qeverisjes së sistemit të drejtësisë.

Gjykata e Lartë bëri publike të hënën më 13 janar listën e kandidatëve që kanë paraqitur interes për vakancën e krijuar në Gjykatën Kushtetuese si rezultat i mbarimit të kryetares së kësaj gjykate, Holta Zaçaj.

Nga 13 kandidatët që janë futur në garë, tre prej tyre, Genta Tafa, Alma Faskaj dhe Lulzim Hamitaj janë ish-komisionerë të Komisionit të Pavarur të Kualifikimit që kreu procesin e vetingut të magjistratëve – institucion që i përfundoi mandati në dhjetor. Interes kanë paraqitur dhe dy ish-komisionerët Publikë, Florjan Ballhysa dhe Irena Nino, mandati i të cilëve përfundoi po në dhjetor.

Nga radhët e Këshillit të Lartë Gjyqësor dhe Këshillit të Lartë të Prokurorisë kandidojnë tre ish-anëtarë. Konkretisht, garojnë ish-kryetarja e e KLGJ-së, Naureda Llagami, ish-anëtari i këtij institucioni, Alban Toro dhe ish-anëtarja e KLP-së, Nurihan (Seiti) Meta.

Për pozicionin vakant në Gjykatën Kushtetuese kanë shpallur interes dhe gjyqtari i Gjykatës së Lartë, Asim Vokshi, kreu i Autoritetit të Konkurrencës, Denar Biba, si dhe juristët Klodian Rado, Rezana Balla dhe Sinan Tafaj.

Më datë 11 dhjetor, kryetari i Gjykatë së Lartë, Sokol Sadushi bëri shpalljen publike për hapjen e procedurës së aplikimit për zgjedhjen me mandat të plotë nga Gjykata e Lartë të anëtarit të Gjykatës Kushtetuese, për vendin e Holta Zaçajt.

Mandati i Holta Zaçajt u bë temë debati publik në dhjetor dhe shkaktoi polemika mes saj dhe kryetarit të Gjykatës së Lartë, Sokol Sadushi. Ky i fundit këmbënguli se mandati i Zaçajt përfundonte në pranverë të vitit 2025 dhe hapi procedurat për përzgjedhjen e pasardhësit të saj duke shpallur vendin vakant. Nga ana tjetër, kryetarja e Gjykatës Kushtetuese pretendoi se mandati i saj përfundonte në fund të vitit 2025 dhe e akuzoi Gjykatën e Lartë për cënimin e sigurisë juridike të mandateve të gjyqtarëve të Gjykatës Kushtetuese.

Megjithëse Gjykata Kushtetuese e gjeti me shkelje njoftimin e kryer nga Gjykata e Lartë, e la në fuqi shpalljen e vakancës. Shumica e anëtarëve të Gjykatës Kushtetuese vendosën mbarimin e mandatit të Zaçajt më 10 mars 2025./BIRN