Bisedat tuaja në ChatGPT nuk janë aq private sa mendoni: Çfarë zbulon CEO i OpenAI

Gjithnjë e më shumë përdorues po flasin për çështje personale në ChatGPT, duke besuar se bisedat e tyre janë private. Drejtori ekzekutiv i OpenAI zbulon pse kjo mund të jetë e rrezikshme.

Çfarë ndodh kur ndani problemet tuaja më personale me inteligjencën artificiale ? Sipas drejtorit ekzekutiv të OpenAI, Sam Altman, kjo po bëhet gjithnjë e më e zakonshme — por askush nuk është siguruar që këto biseda të mbeten private.

Altman, në një intervistë të kohëve të fundit në podkastin This Past Weekend me Theo Von, theksoi se ndryshe nga kur flisni me një psikolog ose avokat, bisedat tuaja me ChatGPT nuk mbrohen nga privilegjet ligjore të privatësise.

“Nëse flisni në ChatGPT për çështjet tuaja më të ndjeshme personale dhe më pas ndërmerren veprime ligjore, ne mund të detyrohemi t’ua dorëzojmë ato”, paralajmëroi Altman.

Përdoruesit po i drejtohen inteligjencës artificiale për mbështetje psikologjike me një ritëm të shpejtë. Shumë e konsiderojnë ChatGPT një hapësirë të sigurt për të folur rreth ankthit, vetmisë, marrëdhënieve apo edhe depresionit.

Por a është vërtet e sigurt? OpenAI i ruan bisedat deri në 30 ditë dhe në disa raste mund t’i mbajë ato për arsye ligjore ose sigurie. Kjo do të thotë që ato nuk fshihen gjithmonë, siç besojnë shumë.

Altman thekson nevojën për të krijuar një kuadër ligjor që mbron bisedat e përdoruesve me inteligjencën artificiale, siç ndodh tashmë në seancat me mjekët dhe terapistët. “Është një problem i madh që nuk ekzistonte një vit më parë. Tani duhet ta adresojmë urgjentisht”, tha ai.

Çfarë do të thotë kjo për ty?

Nëse po përdorni ChatGPT për të shprehur vështirësi emocionale ose psikologjike, mbani mend:

-Bisedat nuk janë të mbrojtura ligjërisht

-Ato mund të tërhiqen për arsye ligjore

-Nuk është një zëvendësim për mbështetjen psikologjike profesionale.

Ndërsa inteligjenca artificiale po bëhet gjithnjë e më e ngulitur në jetën tonë të përditshme, çështjet e privatësisë, besimit dhe etikës po dalin në pah. E ardhmja do të përcaktohet jo vetëm nga ajo që mund të bëjë inteligjenca artificiale, por edhe nga mënyra se si e mbrojmë atë ligjërisht dhe në mënyrë njerëzore .