Flash News

Fuste dr*gë dhe sende të paligjshme në qeli, arrestohet polici i burgut të Drenovës

Lavrov: NATO po rrezikon vetëshkatërrimin me buxhetin e ri ushtarak

​Kurti e Vuçiç "përballen" nesër në Shkup

Bie nga skelat, humb jetën punëtori i ndërtimit në Berat

Prokuroria dërgon për gjykim dy zyrtarët e Bashkisë Korçë

E-TJERA

Blerjet te PDIU e ndihmuan më shumë PS-në se sa ‘kafshimi i mollës së LSI’

Politiko 11 Maj 2021, 20:00

Blerjet te PDIU e ndihmuan më shumë PS-në se sa ‘kafshimi i

Partia Socialiste fitoi 74 mandate në zgjedhjet e 25 prillit në Shqipëri të njëjtin numër mandatesh që pati fituar në 2017, pas një fushate elektorale të mbështetur te ajo që ministrja e Infrastrukturës Belinda Balluku e quajti “kafshimi i mollës së LSI”, pra rrëmbimin e votave që katër vjet më parë i pati marrë LSI përmes rekrutimit të politikanëve të saj vendorë.

Por rezultatet zgjedhore të analizuara nga BIRN sugjerojnë se figurat e “blera” nga LSI nuk i dhanë shumë avantazh PS-së, pasi votat që i humbën LSI duket se kaluan në shumicë te PD dhe jo te PS.

Zgjedhjet e vitit 2021 ka gjasa do të mbahen mend edhe për sasinë e madhe të politikanëve që kanë ndërruar parti nga një, dy apo tre herë, si dhe për surprizat elektorale të politikanëve që nuk kanë shpalosur ndonjë program politik por që rezultuan shumë të suksesshëm.

Fushata e PS-së për rrëmbimin e votave të LSI, të cilat janë konsideruar historikisht si “vota për interes”, ishte më e dukshme në qarkun e Beratit, ku ish-ministri i Drejtësisë për LSI, Nasip Naço dhe ish-deputeti i kësaj partia Klajdi Qama, garuan për socialistët. Në fund të garës, PS mori në qarkun e Beratit 3 mijë vota më pak se sa pati marrë katër vjet më parë. Ajo me të vërtetë e arriti synimin për të marrë 5 mandate në këtë qark, duke i rrëmbyer një mandat LSI-së, por kjo duket se ndodhi më shumë për çështje fati se sa ishte rezultat zgjedhor. Mandati shtesë i PS-së për Beratin erdhi për shkak se LSI-së i munguan vetëm 77 vota nga kuota që i nevojitej për të marrë një mandat.

Në Fier, ku një ish-deputet tjetër i LSI, Robert Bitri, u mor nga socialistët, PS humbi 12 mijë vota në krahasim me katër vjet më parë si dhe një mandat deputeti.

Qarku i vetëm ku flirti me elementët lokalë të LSI-së duket se i ka funksionuar socialistëve, është Durrësi, ku ish-ministri i LSI-së Lefter Koka garoi për socialistët dhe mori 9,600 vota pëlqyese personale. Socialistët morën në total në Durrës 3,858 vota më shumë dhe rrëmbyen mandatin e tetë nga të 14 mandatet e qarkut. Por edhe këtu, mandati i tetë ishte më shumë fat se sa rezultat zgjedhor. Lëvizja Socialiste për Integrim e humbi mandatin në Durrës për vetëm 136 vota dhe nëse LSI do ta merrte mandatin, atëherë PS do të zbriste në 7 mandate.

Socialistët duket se patën më shumë fat me blerjet që bënë nga radhët e Partisë Drejtësi, Integrim dhe Unitet. Këta elementë, si Ornaldo Rakipi në Tiranë dhe Sajmir Hasalla në Elbasan, duket se kontribuuan me vota personale të tilla, duke dhënë efekt edhe në mandate në dy qarqe të rëndësishme. Në Elbasan socialistët fituan gati 14 mijë vota më shumë se sa katër vjet më parë ndërsa Saimir Hasalla, i cili ka qenë kryetar bashkie me PDIU, kontribuoi me 11,500 vota personale. Në Tiranë, socialistët morën 26 mijë vota më shumë, ndërsa Ornaldo Rakipi, 27 vjeçari i biri i ish-deputetit të PDIU Aqif Rakipi, mori gati 16 mijë vota.

Elementë të ish-LSI-së duket se patën kontribut në rezultatin e PS-së në Elbasan dhe Tiranë, por jo në të njëjtat përmasa me grupin e Rakipit. Luan Duzha, deputeti që LSI e bleu nga PR, arriti të marrë gati 7 mijë vota personale në Elbasan ndërsa Alqi Bllako, drejtor i agjencisë shtetërore përgjegjëse për ujësjellësat dhe incineratorët e mbetjeve, kontribuoi me gati 8800 vota personale në Tiranë.

Rritja e votave të socialistëve në Tiranë ndihmoi këtë parti të ruante avantazhin në mandate njësoj si më 2017, pavarësisht se edhe partitë e opozitës u rritën gjithashtu.

Në total, socialistët fituan vota në 4 nga 12 qarqet e vendit në krahasim me vitin 2017, ku fitoret më të mëdha u realizuan në Tiranë e Elbasan ndërsa humbjet më të mëdha u shkaktuan në Fier, Shkodër e Vlorë.

Në rang kombëtar, socialistët morën 48.6% të votave dhe 53% të parlamentit. Mandatet shtesë në krahasim me votën popullore iu dhanë socialistëve pjesërisht nga fati, si në Berat dhe Durrës, dhe pjesërisht nga avantazhi që i jep formula D’Hondt partisë më të madhe. Por suksesi më i madh i PS duket se u realizua në Elbasan dhe Tiranë falë ndihmës se elementëve të huazuar nga PDIU. Reporter.al 

Të fundit