Kur gazetarët bëhen 'spektatorë' të politikës, Fuga kritik me mediat: I fusin një kafe me kandidatët dhe ndahen si krushq

Akademiku Artan Fuga ka kritikuar mediat, e veçanërisht, drejtuesit e emisioneve televizive që në vrazhdën e prag fushatës zgjedhore, ftojnë në studio kandidatët për deputetë majtas dhe djathtas.

Në një reagim, Fuga kritikon mënyrën se si drejtuesit e emisioneve zgjedhin të përqasen me kandidatët respektivë të partive politike.

Akademiku thekson se kandidatët nuk pyeten për çështje konkrete, madje, nguten për t’iu çjerrë maskën e propagandës.

REAGIMI

Dosja media

E dinë gazetarët dhe gazetaret e televizioneve, sidomos moderatorët e emisioneve që marrin në intervistë kandidatë për deputetë, rolin e tyre para publikut apo jo?

Pa përgjithësuar në mënyrë absolute, se nuk do ishte e saktë, shoh prej tyre, gra a burra, që nuk e kuptojnë sa dhe si duhet se cili është misioni i tyre përpara publikut.

Ka që bëjnë pyetje dhe presin përgjigje, pastaj lexojnë pyetjen e radhës pa lidhje me përgjigjen e marrë. Ky është debat shurdhësh.

Ca bëjnë pyetje sikur mund të pyesësh dikë te stacioni i trenit : Ora sa është ora?

Pyetje shabllon, pa asnjë lidhje me kandidatin. 

Ka ca që shohin me sy të përdëllyer kandidatin politik, a thua se ju dhimbset i gjori në vend t'i çjerrin maskën e propagandës dhe ta bëjnë për ujë të ftohtë në të mirë të publikut.

Ka të tjerë që merren me çështje tretësore, jo e lagu, jo se lagu, sa për të shtyrë minutat e emisionit dhe për të treguar kollaren e bukur ose dekoltenë e hapur.

Ka ca që nuk ja kanë haberin për dosjet që duhet trajtuar, nuk dinë të dhëna, por hanë çdo gjë që u thuhet sikur të ishin ballokume Elbasani.

Ka të tjera dhe të tjerë që quajnë emision të nxehtë kur kandidatët rivalë ndërpresin njëri tjetrin, gjasme debatojnë dhe publiku nuk merr vesh asgjë.

Asnjë e dhënë vizuale nuk paraqitet.

Merren si të vërteta çfarë thonë kandidatët.

Pa ekspertë në studio.

Asnjë lidhje tv me audiencat, aktorët e interesit.

Ka dalë formula idiote një politikan dhe një "analist" në të majtë, një politikan dhe një "analist" në të djathtë, si shqytarë këta shoqëruesit, dhe ping - pong pa pikë bereqeti.

Asgjë për personalitetin e kandidatëve.

Merren me gjëra të vjetra që edhe gjyshi im i dinte kur ishte gjallë. Jo lista të hapura jo të mbyllura,

jo pasaporfta çeke, jo letërnjoftimi bullgar,

jo unë i ri, jo ti i vjetër, debat me nuanca të rënda genocidiste dhe bulliste, tmerr!

Pastaj në paqe, pas emisionit i fusin një kafe me kandidatët dhe ndahen si krushq pas vizitave për nderrim nishanesh.

Ore, e kuptoni se luan fatet e Shqipërisë, apo kush po e çan trapin!