Debati për emigrantët në Britani, shkencëtarja në Harvard ka një përgjigje për anglezët dhe një mesazh për qeverinë shqiptare

Profesoresha shqiptare në Harvard, Detina Zalli ka reaguar lidhur me debatin për emigrantët shqiptarë si në mediat angleze, ashtu edhe pas deklaratave të sekretares së Brendshme së Britanisë, Suella Braverman e cila e cilësoi si pushtim nga shqiptarët kalimin me varka të kanalit të Lamanshit. 

Në një postim në Facebook, ajo shkruan se është ndjerë e trishtuar kur ka parë etiketimet që mediat britanike kanë bërë në adresë të emigrantëve shqiptarë, si dhe ka sjellë në vëmendje kohën kur ka mbërritur vetë me familjen në Angli, kur ishte vetëm ishte vetëm 13 vjeç.

“Gjatë ditëve të fundit, jam ndjerë e trishtuar nga mënyra se si media në Mbretërinë e Bashkuar u është referuar shqiptarëve me kaq negativitet, duke i etiketuar ata “kriminelë. “Kjo më solli kujtimet kur isha 13 vjeç dhe fëmijët e tjerë në shkollën time në mënyrë rutinore më referuan si “një kriminel” për arratisje në Mbretërinë e Bashkuar për t’i shpëtuar luftës civile. Kjo vazhdoi për tre vjet rresht. Çdo ditë. Isha e shkatërruar, më mungonte vetëvlerësimi dhe jeta ime nuk kishte kuptim. Kanë kaluar njëzet vjet, dhe gjatë kësaj kohe kam pasur bekimin të punoj në disa nga universitetet më prestigjioze në botë, përfshirë Universitetin e Harvardit, Universitetin e Oksfordit dhe Universitetin e Kembrixhit.

Unë kam qenë shkencëtarja më e re post-doktoral në Harvard, kam drejtuar kurse për studentë universitarë dhe pasuniversitarë, kam fituar shumë bursa dhe kam bashkëpunuar me laureatët e çmimit Nobel. Por më e rëndësishmja, unë kam ndikuar në jetën e më shumë se 10,000 studentëve nga prejardhje të ulët socio-ekonomike në Mbretërinë e Bashkuar, SHBA, Indi, Kinë dhe Evropën Lindore. Kam ndihmuar refugjatët, emigrantët dhe pacientët me kancer (dhe do të vazhdoj ta bëj këtë).

Po. Dhe unë jam shqiptar. Si fëmijë, nuk mund të mbrohesha. Ndjej se është e rëndësishme të ngre zërin për të shpëtuar fëmijët e tjerë shqiptarë që shkojnë në shkollat e Mbretërisë së Bashkuar dhe që mund të përjetojnë bullizëm Shpresoj që media në Mbretërinë e Bashkuar të reflektojë për këtë. Siç them shpesh: “Pavarësisht se nga je. Të gjithë flasim të njëjtën gjuhë. Gjuha e ADN-së! ”, shkruan Zalli.

Po ashtu, në një postim tjetër, shkencëtarja shqiptare ka një mesazh edhe për qeverinë shqiptare.

 “Te dashur qeveritare shqipetare,

Kohet e fundit kemi pare lajme negative rreth shqipetareve ne Mbreterine e Bashkuar. Ndonese imigruar prej shume vitesh nga Shqiperia, jemi krenar qe jemi shqipetar dhe prezantojme Shqiperine.

Ne e duam Shqiperine.

Por pyetja ime eshte: "A na do Shqiperia ne?"

Shikoje sy te deshperuar te te rinjeve shqipetare, student ekselent pa pune, njerez pa shprese qe jane gati te marrin gomonen dhe te imigrojne ne vende te tjera me mundesine e pare qe ata gjejne (tamam si vitet 1990). Gjermania eshte shpresa e tyre e vetme.

Nuk ka kohe per "akuzime". Nuk ka kohe per "ankesa". Nuk ka kohe per "fjale ne ere". Ka kohe per "VEPRA".

Ne, si shqipetare te Diasposes nuk i ndryshojme dot gjerat pa ndihmen dhe deshiren tuaj. Jeni ju kyci i Shqiperise.

Na Ndihmoni Tu Ndihmojme! Jo me Fjale; me VEPRA!”, shkruan ajo.