Demokracia në Shqipëri ka marrë goditje në 5 vitet e fundit/ Mungon paanshmëria, ‘shfrenohet’ korrupsioni

Demokracia në Shqipëri është dobësuar ndjeshëm në pesë vitet e fundit. Një raport i Indeksit të Gjendjes Globale të Demokracisë, ka sjellë një pasqyrë të demokracisë shqiptare në disa vektorë studimi.

Sipas raportit të publikuar nga EURACTIV, Shqipëria ka shënuar një nivel historik në administrimin e paanshëm duke kaluar nga 1.0 të mundshme në vetëm 0.37. Paanshmëria e administratës përcakton nëse është e drejtë apo parashikueshme në funksionimin e saj.

Shqipëria rezultoi me rezultate edhe më të ulëta për mungesën e korrupsionit me vetëm 0.29, duke sinjalizuar se korrupsioni është i shfrenuar.

Për vitin 2015, Shqipëria mori një rezultat të kombinuar në  2.34 nga 4.0 të mundshme. Deri në vitin 2020, niveli i saj ra në 2.30 duke shënuar një ulje të ndjeshme të korrupsionit, administrimit të paanshëm dhe demokracisë së drejtpërdrejtë. Një ulje e tillë në këta indikatorë u shënua në mandatin e parë dhe të dytë të kryeministrit Edi Rama.

Rezultatin më të ulët e shënoi demokracia e drejtpërdejtë, me 0.08 nga 1.0 të mundshme. Fusha të tjera me performancë të dobët ishin pavarësia e gjyqësorit 0.48 dhe të drejtat sociale dhe barazia 0.55.

Shqipëria ka shënuar rezultate të dobëta për lirinë e shprehjes me vetëm 0.54, nën mesataren globale.

Zgjedhjet u konsideruan jo veçanërisht të pastra, me një rezultat prej vetëm 0,59, dhe partitë politike gjithashtu nuk u konsideruan si të lira 0,62.

Shqipëria performoi mirë në qeverisjen e zgjedhur, gjë që i referohet se në çfarë mase zgjedhjet e përcaktojnë qeverisjen. Një  rezultat të mirë mori në të drejtën e votës gjithëpërfshirëse, eksesin në drejtësi, liritë civile, lirinë e fesë dhe lirinë e lëvizjes.

Raporti e ka përshkruar si një ‘demokraci të dobët’, edhe për shkak se Shqipëria është vendi me dënimet më të gjata me burg në botë për shkak të thyerjes së kufizimeve të Covid-19, duke arritur deri në 15 vite burgim. Në dukje është vënë edhe vendosja e gjobave për dezinformimin lidhur me pandeminë Covid-19.