Denoncimi i ish-pacientit të "Covid 2": Më kërcënuan për vdekje / Reagon mjekja: Nuk është e vërtetë

Një tjetër qytetar ka hedhur akuza të forta ndaj stafeve të spitaleve covid, pasi pretendon se pacientët trajtohen në kushte skandaloze.

Bëhet fjalë për qytetarin Andon Qako i cili ka qenë i shtruar te spitali "Shefqet Ndroqi" dhe në një dëshmi për News 24, deklaron se brenda në spital ka pasur mungesë të ushqimit, dhe se e kanë kërcënuar me vdekje, duke e detyruar që të dalë para kohe nga spitali në shenjë proteste.

Ai shton më tej se në dhomën e tij janë mbytur dy persona, por të gjithë këto deklarata të tij mbeten për t’u verifikuar, pasi janë shumë të rënda.

"Erdha sot sepse kam tezen, erdhi dje nga Fieri dhe erdha për t'i sjellë diçka. I solla lëng frutash, ujë, biskot, por aty nuk më lejonin sepse duan lekë, është një formë që të marrin para. Nuk mund të çosh lëng fruta se janë me diabet, po mirë mo nëse është me diabet nuk do të konsumojë.

Unë isha vet tek "Shefqet Ndroqi" dhe kam dalë në datën 6 dhjetor dhe te "Shefqet Ndroqi" unë vdisja për të ngrënë, s'kishte ushqim, ishte ushqim kërrmë, nuk u ngopa ndonjëherë. Kalonin të vdekurit sikur po bënin paradë, po unë pse duhet t'i shikoja të vdekur. Ai kalonte me karrocë dhe i kishte të paketuar të vdekurit me qese dhe nuk mbyllej as dere që ne mos thoshin "Ej ata po vdesin, edhe unë do vdes". Unë në 19 ditë kam parë 60 të vdekur.  

Për më tepër unë kam dalë nga spitali në shenjë proteste se unë jam kërcënuar me jetë në atë spital. Pse u kërcënova unë? Ishte një pukjan e quanin Lek, në gradë të fundit dhe kërkonte ndihmë se atje je i izoluar. Ka 13 pacientë për një infermier dhe ai më thotë që më sill infermieren dhe unë u çova për të kërkuar infermierin dhe kur kalovi ky që transporton të vdekurit më tha do të të nxjerrim me sytë përpjetë. Unë protestova dhe thash nuk qendroj më në atë spital. Kur dola nga spitali vajta në polici, por nuk ma morën denoncimin. Dola nga spitali pa u shëruar sepse më kërcënoi me jetë. Kur unë protestova, erdhën ato mjeket aty dhe më thanë që ai ashtu u thotë të gjithëve. Gjatë 19 ditëve nga 60 që vdiqën, pashë dy sesi vdiqën që i vranë. Atje vdisje me pështymën tëndë, t'i s'kishe shërbim, do mbyteshe, atje koha ishte e kufizuar me punë sekondash, infermierja ishte larg. Atje ishte 13 pacientë të gradës së fundit për një infermiere ku ligjërisht mesa di unë duhet të jetë dy pacientë për një infermiere. Aty vinin infermiere me një javë punë, pa eksperiencë. Këto shqetësimë ja kam shfaqur dhe psikologes, Irenës. Nuk u ngopa njëherë, s'kishte ushqim, më jepnin ushqimin e atij tjetrit që s'e hante.

Unë isha vetë dëshmitar i pashë, ishte një Aristill nga Fieri, te dhoma ime vdiqën dy. Petritin e vranë njëher, ishte Petriti nga Korça  e mbytën. Unë i bëj akuza direkte, akuzoj unë. Kur më kërcënuan me jëtë, mora policinë por nuk erdhi." shprehet Qako.

Ndërkohë, mjekja e spitalit ‘Shefqet Ndroqi’, Silva Bala në një reagim për News24 i hedh poshtë akuzat e ngritura nga , ndërsa tha se do i drejtohen prokurorisë për të hetuar e zbardhur të vërtetën.

“Mua më vjen keq që me punën e personelit të luhet në këtë mënyrë, të sfumohet apo shkelet puna e personelit që është në detyrë 24 orë në 24. Nuk është e vërtetë që ushqimet e familjarëve nuk lejohen dhe u merret në sajë të vlerave monetare. Absolutisht jo! Aty ka 2 personel shëndetësor, që në orare të caktuara marrin ushqimet dhe veshmbathjet që i dërgojnë në dhomat përkatëse. Kjo është të luash edhe me jetën e të sëmurëve e familjarëve, një propagandë e tillë, nuk i shërben askujt, por më shumë pacientëve.” tha Bala.

Sa i takon ushqimit që u jepet pacientëve nga spitali mjekja tha se ai hartohet me dieotologë, dhe nuk i kursehet askujt.

"Ushqimi për të sëmurët bëhet me mjekë dietologë, sasia, yndyrnat, karbohidratet, kaloria përcaktohen nga dietologë dhe ushqimi është i duhur që duhet të marrin pacientët përmban lëndët e domosdoshme për këto pacientë. Edhe nëse pacientët kanë patur kërkesë për ushqim shtesë, nuk i kursehet askujt. Të sëmurët që nuk ushqehen dot, ngrihen nga personeli shëndetësor.” u shpreh Bala, e cila solli në vëmendje edhe ditët kur ish pacienti Qako, ishte i shtruar në spital.

“Nëse nuk gaboj, ka qenë i shtruar në një nga klinikat e mia, në pavionin e tretë A, i është shërbyer, ka marrë mjekimin dhe ka dalë vetë nga spitali. Nuk do kishte dalë nga ne nëse nuk do ishte shëruar, ka ikur vetë pa pritur asnjë njeri.  Në spital ka psikologe, ka shkruar edhe te ky pacientë. Është një pacient që është trajtuar, ka dalë nga sptiali me gjithë dokumentacionin e rregullt.” -përfundoi mjekja.