Denoncimi/ Ilaçet kimio të munguara në QSUT, shiten kontrabandë përpara Onkologjikut

Gazetari Osman Stafa ka denoncuar një skandal të madh që lidhet me repartin e Onkologjisë në QSUNT, ku shiten kontrabandë ilaçe kimio. Sipas Stafës, shumë farmaci rreth QSUNT-së ofrojnë ilaçe kimio kontrabandë, të cilat mungojnë në repartin e Onkologjisë.

 Ai thekson se ka prova për këtë, por nuk mund t’i publikojë pasi rrezikohet jeta e denoncuesve. Stafa flet edhe për të dhëna që tregojnë se pacientët janë detyruar të paguajnë jo vetëm për ilaçet, por edhe për "shërbime" të mjekëve, të cilët kanë bashkëpunuar me kontrabandistët. Ai kërkon një hetim të plotë mbi këtë çështje dhe e konsideron situatën si një skandal të papranueshëm.

Postimi i plotë: 

Ilaçet kimio shiten edhe përpara Onkologjikut!

Në informacionet e mia, të mbështetaura edhe në prova e fakte, faktohet se shumë farmaci rreth e rrotull QSUNT dhe jo vetëm, shesin kimio kontrabandë. (Nuk mund të publikoj biseda, për shkak se vihen në rrezik njerëz).

Gjatë këtyre 5 viteve të fundit, mungesat e kimiove kanë qënë të frikshme. Prej këtyre mungesave kanë përfituar kontrabanda.

Sipas të dhënave që kam mbledhur, sekserët e ilaçeve kimio hynin edhe në spital, për t’u kërkuar mjekëve t’u çonin pacientë që t’u blenin medikamentet.

Pacientët prej hallit, dhe prej asaj që po përballeshin shkonin dhe i blinin, duke mos paguar vetëm vlerën e kimios kontrabandë, por edhe duke paguar një çmim për mjekun.

Si funksionon kjo?

Prsh heceptina kontrabandë është blerë 800 euro.

Por nëse pacienti nuk shkonte i referuar nga mjeku dhe kontrabandisti bindej, herceptinën e merrte 200 euro më pak. (Këto dëshmi do i publikoj me zë dhe figurë kur të vij koha).

Më poshtë do publikoj rastin e një personi i cili ka blerë para derës së Onkologjikut, kimion. Kostoja e goserelinës? 262 mijë lekë.
Është skandal dhe e papranueshme kjo situatë. (Kjo ka ndodhur përpara disa javësh).

Gjithashtu është e papranueshme kjo situatë, pasi mjekët dhe Shefja e Onkologjikut, Silvana Çeliku, kanë qënë në dijeni të këtij fenomeni dhe nuk e kanë ngritur si shqetësim. Por e kanë pranuar.

Pse e kanë pranuar?

Pse nuk kanë folur, kur nuk mund të trajtonin pacientët me kancer?

Si mjekë të caktuar bëheshin bashkëpunëtor të kontrabandës?

Mos ndoshta ka ndonjë arsye tjetër sesi mjekët e Onkologjikut, “binden” të mosflasin?