Flash News

Aksident te Unaza e Madhe në Tiranë, 2 të plagosur

Emri/ Aksident në Fushë-Arrëz, humb jetën shoferi

Kochorashvil ndëshkon kuqezinjtë, Gjeorgjia kalon në avantazh

Hoxha luan titullar ndaj Gjeorgjisë, publikohen formacionet zyrtare të ndeshjes

Berisha: Konservatorizimi në Shqipëri ka rrënjë më të thella, ku qëndrojnë mijëra jetë të sakrifikuara

E-TJERA

Dështimi i radhës, lirohet nga burgu “i forti” i Niklës, Durim Bami

Politiko 14 Gusht 2024, 08:42

Dështimi i radhës, lirohet nga burgu “i forti” i

Është liruar nga burgu në Emiratet e Bashkuara Arabe, Durim Bami, një prej personazheve më të njohur të botës së krimit në vendin tonë.

Ai ka qëndruar për rreth dy muaj në burg, pasi u arrestua nga autoritetet e Emirateve të Bashkuara Arabe në muajin Qershor, për shkak se ishte shpallur në kërkim ndërkombëtar nga drejtësia shqiptare.

Pas arrestimit, gjykata në Dubai i caktoi masën e “arrestit me burg” me afat për 60 ditë dhe tashmë ai është liruar, pasi e njëjta gjykatë ka vendosur të mos japë aprovimin për ekstradimin e tij drejt vendit tonë.

Urdhër-arresti për 45-vjeçarin Durim Bami u lëshua nga SPAK në kuadër të operacionit të koduar “Revanshi” më 15 Maj të këtij, i cili ishte pjesë e listës prej 50 personash të akuzuar për krime të rënda, të cilat u zbuluan pas zbërthimit të bisedave në aplikacionin e enkriptuar “Sky Ecc”.

Bami kishte shkuar në Dubai, bashkë me të vëllain Valter Bamin para operacionit të SPAK. Mbi 45-vjeçarin rëndojnë akuzat për kryerjen e veprave penale: “Sigurimi i kushteve dhe i mjeteve materiale për të kryer vrasje”, “Grupi i strukturuar kriminal”, “Kultivimi i bimëve narkotike”, dhe “Kryerja e veprave penale nga organizata kriminale, ose grup i strukturuar kriminal”.

Bami akuzohet se bashkë me Endrit Doklen, Marklen Hakën dhe Xhelal Rrajën, do të vrisnin ish-deputetin Arben Ndokan. Detyra e tij do të ishte sigurimi i informacioneve për lokalizimin e ish-deputetit dhe të njoftonte të tjerët. Ndërkohë, për vrasjen e Tori Xheçukës dhe Erigers Mihasit, 45-vjeçari ka pasur rol kryesor të organizatorit.

Gjithashtu, bashkë me ish-policin Altin Morina ai akuzohet për kultivim narkotikësh në zonën e Krujës.

Autoritetet shqiptare deri më sot nuk kanë arritur të ekstradojnë asnjë person nga Emiratet e Bashkuara Arabe, teksa vlen për t’u përmendur se në Dubai qëndrojnë të qetë shumë personazhe të njohur të botës së krimit në vendin tonë.

I vetmi person i cili është deportuar nga Dubai ka qenë Bruno Çobo, i cili ishte shpallur në kërkim ndërkombëtar si pjesë e një grupi të strukturuar kriminal që përfitoi 4.7 milion euro nëpërmjet skemave të mashtrimit në Call Center. Por, sërish, deportimi i tij u krye vetëm pas dëshirës së tij.

Të fundit