Diplomati rus ‘non grata’ në Tiranë, cilat janë ‘fërkimet’ që pati qeveria Rama me ambasadën për vaksinat pak javë më parë

Qeveria shqiptare shpalli person ‘non grata’ diplomatin rus Alexey Krivosheev. Sipas ministrisë së Punëve të Jashtme, diplomati ka shkelur masat anti-Covid në mënyrë të përsëritur.

“Që prej muajit prill 2020, por dhe në fillim të këtij viti, Qeveria Shqiptare ka pasur ankesa dhe denoncime të vazhdueshme, mbi shkeljet e hapura të masave të marra nga ana e diplomatit të ambasadës së Federatës Ruse në Tiranë”, thuhet në njoftim, ndërsa qeveria shqiptare i ka kërkuar diplomatit të largohet brenda 72 orësh nga momenti i dhënies së njoftimit.

Por nëse kthehemi vetëm pak javë pas, kujtojmë se mediat bënë publike replikat në distancë mes qeverisë dhe ambasadës ruse në Tiranë sa i takon vaksinës Spunik V.  

Pak ditë para Vitit të Ri, ambasada ruse në Tiranë i bëri me dije qeverisë shqiptare se është e gatshme të negociojë për t’i garantuar Shqipërisë vaksinën kundër COVID-19.

Reagimi i ambasadës erdhi pas kritikave të Drejtorit të Komunikimit në Kryeministri, Endri Fuga, i cili dy ditë përpara shprehu rezerva për Komisionin Evropian se ka lënë pas dorë vendet e Ballkanit Perëndimor për sa i takon vaksinës anti-COVID. 

Lidhur me këtë fakt, kryeministri Edi Rama e quajti ofertën e ambasadës ruse për vaksinën anti-Covid "Sputnik V" si një provokim qesharak dhe theksoi se fillimisht kishte menduar se reagimi ishte një meme.

“Kam menduar që ka qenë një meme, ajo që pashë që ambasada e Rusisë kishte postuar nga Tëitter Drejtorit të Komunikimit (Endri Fugës), retëeet të shefes së Komisionit Europian. Për një shtet serioz është krejtësisht e papërshtatshme që të bëjë provokime të tilla dhe kur them provokim nuk po i paraprij ndonjë demarshi pranë shtetit rus, sepse ky është provokim qesharak dhe nuk është mirë që një vend serioz si Rusia të bëhet qesharake përmes këtyre lloj postimeve dhe një ambasadë si ajo ruse, që është një ambasadë e rëndësishme të sillet sikur është një seksion i Portokallisë, apo një konkurrent i Portokallisë. Shpreh keqardhje për këtë sepse nuk shoh arsye që ambasada e Rusisë të përfshihet në prodhimin e memeve”, u shpreh Rama.

Menjëherë pas tij, reagoi sërish ambasada ruse e cila shrkuan se “Është e vështirë të kuptohet pse Kryeministri i nderuar i Shqipërisë z. Edi Rama u mërzit kaq shumë nga komenti i Ambasadës së Rusisë në faqen e saj në Facebook më 28 dhjetor.

Ambasada vetëm reagoi ndaj re-tëitit të Drejtorit të Komunikimit të Kryeministrit, z. E. Fuga, në lidhje me fillimin e vaksinimit kundër Covid-19 në vendet anëtare të BE-së dhe deklaratës e vetë të kreut të Qeverisë së Shqipërisë në konferencën e tij për shtyp në 24 dhjetor, gjatë së cilës ai përmendi vështirësitë në sigurimin sa më shpejt të jetë e mundur e sasisë së nevojshme të vaksinave për popullatën e vendit”.

Kjo nuk është hera e parë që Shqipëria shpall “non grata” diplomatë rusë.

Në datë 26 mars të 3 viteve më parë, qeveria shpalli “non grata” dy diplomatë rusë, Vladislav Filipov, atashe ushtarak, si dhe Alexey Nikolaevich Balashov, sekretar i parë i Ambasadës me arsyetimin se veprimtaria e tyre nuk përputhej me statusin e tyre diplomatik.