Dita e 10-të e grevës, naftëtarja për Politiko: Do marrim edhe fëmijët, pa marrë pagat dalim të vdekura; propozimi që kemi për kryeministrin

Mimoza Muhametaj, dita e 10-të e grevës së urisë

Këtë të shtunë, punonjëse të rafinerisë së Ballshit shënojnë ditën e dhjetë të grevës së urisë.

Ata kërkojnë rrogat e papaguara nga kompanitë që kanë menaxhuara uzinën dhe shprehen të vendosura se pavarësisht gjendjes së tyre të përkeqësuar shëndetësore, nuk do të dalin nga greva pa marrë paratë që u takojnë.

Një nga grevistet, Mimoza Muhametaj, e cila fliste me vështirësi prej gjendjes së rënduar, tregon për Politiko.al se vetëm të vdekura do të dalin që aty, nëse nuk marrin atë që u takon, madje planifikojnë që në shenjë proteste të marrin edhe fëmijët.

Madje, ajo ka edhe një përgjigje për kryeministrin Edi Rama, i cili u ka bërë thirrje që të dalin nga greva dhe të negociojnë për pikat që kërkojnë të përmbushen.

Jeni në ditën e 10-të të grevës së urisë, si është gjendja juaj sot?

Jemi shumë të rënduara. Një shoqe e jona ka qenë në gjendje të rënduar gjatë natës, ka qenë me të vjella, tension, marrje mendsh. Jemi shumë të stresuara dhe të zhgënjyera. Po na vret stresi dhe gënjeshtra çdo ditë e më shumë.

Kryeministri ju ka bërë thirrje që të dilni nga greva dhe të negocioni, a keni një përgjigje për Edi Ramën?

Përgjigja për kryeministrin është që të shohë fillimisht gjendjen e grave që ja në në grevë dhe të na japë pagat e prapambetura, paratë që kemi fituar me gjyq, pasi është shumë mosbesuese.

Edhe më përpara na e ka bërë këtë premtim, por asgjë. Para një muaji shkuam në Tiranë dhe nuk na priti njeri. Madje, policia përdori dhunë dhe na ka rrahur. Kështu që, është e pamundur , ose të dërgojmë një përfaqësi për negocim paralel me grevën. Ne nuk dalim që këtu, vetëm të vdekura. E fundit do të marrim edhe fëmijët në grevë.

Është përfolur në media se përfaqësues të sindikatës suaj kanë deklaruar gjatë këtyre ditëve se ka patur tentativa për të prishur grevën. Për çfarë tentativash bëhet fjalë?

Po, e vërtetë. Ka patur tentativa tek-tuk. Ka patur kërcënime të tipit që kush ka familjarët apo të afërmit në punë shteti, do t’i heqin nga puna.

Dje, kreu i sindikatës së naftëtarëve, Sokol Dautaj rezultoi pozitiv me covid-19. A keni patur kontakte me të dhe a keni frikë se mund të infektoheni me covid-19?

Jo nuk kemi patur kontakte këto kohë, por flasim në telefon më te. Frika është sigurisht, por ne nuk pranojmë të shkojmë në spital. Qëllimi ynë janë paratë e fituara me gjyq.

Sa është shuma që pretendoni ?

Kam punuar si teknologe për 36 vjet dhe kam 13 paga të prapambetura të fituarta me gjyq. Janë rreth nëntë milionë lekë që duhet të japin.

***

Që nga marsi 2018, rafineria është menaxhuar nga kompanitë Tosk Energji dhe Bylis Energji, të cilat janë në pronësi të dy kompanie zvicerane, CFD Conseils Sarl dhe PGFS Pilotage & Gestion S.

Së fundmi, KPTHN e Ballshit administrohet nga kompania Allum Enterprises, e cila ka negociuar me naftëtarët, por pa dhënë ndonjë zgjidhje konkrete për rifillimin e punës dhe pagesën e rrogave të prapambetura.

/S.F/

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm