“Do të bëj thela-thela”/ Dikur kërcënoi burrin e të dashurës, ish-drejtori i Doganës Fier shkaktoi aksidentin e dyfishtë në Vlorë

Një aksident me dy persona të plagosur ndodhi pasditen e sotme në Vlorë, ku një 45-vjeçar, nën drejtimin e një automjetit tip “Volkswagen Tuareg”, përplasi fillimisht një këmbësore.

 E teksa me këmbën në pedalen e gazit tentoi të largohej nga vendngjarja përplasi dhunshëm disa metra më tutje një tjetër automjet. Në këtë makinë mbeti po ashtu i plagosur një person.

“Shtetasi A.L. (Arlind Lagji), rreth 45 vjeç, duke drejtuar automjetin tip ‘Volksëagen’ ka aksidentuar shtetasen I.S., rreth 66 vjeçe, këmbësore në rrugë.  Drejtuesi i automjetit është larguar nga vendi i aksidentit dhe ka vijuar lëvizjen, në këtë aks rrugor, ku pas disa metrash është përplasur me automjetin me drejtues shtetasin B.C., 63 vjeç”, njoftoi policia.

I.S dhe B.C u transportuan në spital dhe ndodhen nën kujdesin e mjekëve.

“Drejtuesi i automjetit shtetasi A.L. (Arlind Lagji) u shoqërua në Komisariat, për veprime të mëtejshme”, ndërsa “grupi hetimor po kryen veprimet e mëtejshme për këtë rast”, shtuan të njëjtat burime.

Ndërkaq detaje të reja janë zbardhur. Mësohet se shoferi 45-vjeçar i mjeti tip “Volkswagen Tuareg”, është Arlind Lagji, Drejtori i Doganës Fier deri pak muaj më parë.

Lagji u shkarkua nga detyra pas një raportimi mediatik që tregoi se ai kishte dhunuar dhe kërcënuar me jetë një person, me bashkëshorten e të cilit kishte pasur marrëdhënie intime.

Si nisi konflikti që e shkarkoi nga detyra

Në Shtator 2022, një emision televiziv tregoi sesi Arlind Lagji, ende në detyrë si Drejtori i Doganës Fier, dhunoi dhe kërcënoi me jetë një qytetar.

Denoncuesi Algert Belulaj bëri me dije se konfliktet me drejtorin e Doganës filluan pasi mësoi se ai dhe bashkëshortja e tij kishin një lidhje jashtëmartesore.

Belulaj u shpreh se lidhur me kërcënimet bëri edhe denoncim në organet ligjzbatuese, por shtoi se ndaj Lagjit nuk u mor asnjë masë.

Në një audio-publikim të publikuar, Lagji i drejtohet Belulajt me fjalët: do të bëj thela thela që kur të dalësh në mes të Fierit të dridhet mishi… Disa pamje të publikuara treguan momentet e dhunës së drejtorit ndaj Bellulajt. Ky i fundit tregoi se Arlind Lagji e kërcënoi me armë zjarri.

Arlind Lagji i thotë qytetarit Algert Belulaj se është nipi i Orik Shytit të ‘Hakmarrjes për Drejtësi’, djali i motrës së tij, duke e kanosur se ata persona mund ta zhdukin.