Dosja e Call Center-ëve në Tiranë: Si u zhvatën mbi 8 milionë dollarë përmes kriptove?

Detaje të reja janë zbardhur nga një hetim që lidhet me tre call center në Tiranë, të dyshuar për përfshirje në skema mashtruese financiare dhe qarkullim të të ardhurave përmes kriptovalutave.

Sipas dosjes hetimore, autoritetet austriake kanë dërguar indicie lidhur me dy shtetas shqiptarë, Mateo Hoxha dhe Tedi Agastra.

Në dosje thuhet se ata kanë përfituar respektivisht 3.219.915 dollarë dhe 4.811.154 dollarë në formë kriptovalutash, duke e çuar totalin e dyshuar në mbi 8 milionë dollarë.

Më tej, hetimi ka vijuar me gjurmimin e lëvizjes së këtyre kriptovalutave dhe mënyrën e konvertimit të tyre në valuta të ndryshme.

Sipas të njëjtave të dhëna hetimore, Tedi Agastra dyshohet se ka bashkëpunuar me babanë e tij, Arbëror Agastrën, i cili rezulton pronar i një zyre këmbimi valutor “Alba Forex”, ku janë dokumentuar, sipas dosjes, këmbime të kriptovalutave në para fizike.

Pjesë nga dosja:

Nga ana e autoriteteve Austriake nëpërmjet Oficerit të kontaktit në datë 14.01 jemi informuar se rrjeti i Call Centerave për të cilin po hetohet kishte lidhje me dy shtetas te cilët sipas tyre ishin përfitues fundor të kriptovalutave të këtyre Call Center. Sipas këtij informacioni këta ishin shtetasit Mateo Hoxha, i cili kishte përfituar në total 3.219.915 USD dhe shtetasi Tedi Agastra i cili kishte përfituar 4.811.154 USD.

Në kuadër të hetimit të një procedimi tjetër të zhvilluar pranë kësaj prokurorie konkretisht Procedimit Penal 3167/2024 të realizuar nëpërmjet metodave speciale të hetimit është arritur të dokumentohej dhe në përfundim të lëshoheshin nga Gjykata e Shkallës së Parë të Juridiksionit të Përgjithshëm Tiranë 19 urdhër arreste për veprat penale të “Ushtrimi pa licencë të veprimtarive financiare” dhe “Fshehja e të ardhurave” parashikuar nga nenet 170/ç dhe 180.

Vlen të theksohet fakti se në procedimin e mësipërm njëri nga të arrestuarit ishte dhe shtetasi Tedi Arbëror Agastra, i datëlindjes 19.06.2003. Ky shtetas në bashkëpunim me babain e tij i cili ka zyrën e këmbimit valutor “Alba Forex” të ndodhur në rrugën “Abdyl Frashëri”, ku në procedimin tjetër i është dokumentuar këmbimi i kriptovalutave në para FIAT.

Babai i tij shtetasi Arbëror Agastra është nën masën e sigurimit personal “Arrest në shtëpi”. Në lidhje me shtetasit Mateo Hoxha rezulton të jetë njohje dhe punonjës nga muaji Dhjetor 2024 i zyrës së këmbimit valutor “Alba Forex”.

Në datë 20.01.2025 oficeri i kontaktit ka informuar nëpërmjet shkresës përkatëse se në shtetin austriak janë depozituar kallëzime të reja nga shtetas austriakë. E dëmtuara është kontaktuar nëpërmjet telefonit nga këshilltarë financiarë të supozuar dhe është ftuar që të bënte investime në platformën “imctrading”. Transaksionet janë kryer në data të ndryshme.

Pas interesimit të të dëmtuarës në sistemin “OKX”, në datë 01.01.2025 “OKX” ka kthyer informacion të detajuar për trasnaksionet dhe këto transaksione lidhen në mënyrë të drejtpërdrejtë me shetasit Mateo Hoxha dhe Tedi Agastra. Të dy këta shtetas gjatë vitit 2024 kanë marrë vlera të konsiderueshme në adresa Kripto dhe më pas i kanë transferuar në adresa të tjera Kripto.