“Drejtohet nga kupola e partisë”, Fuga: E jap votën me kusht, hallall se kush realizon kthimin e ekonomisë së tregut

Akademiku Artan Fuga ka bërë një analizë të situatës ekonomike në vend, ku ka evidentuar se mungon ekonomia e tregut. Sipas tij, hapi i duhur për zhvillimin e ekonomisë është rikthimi i këtyre vlerave. Ai shton se në Shqipëri nuk gjen zbatim termi ekonomi tregu.

Përmes një postimi në Facebook, ai shkruan se “Ku është ekonomia e tregut sot te ne në Shqipëri edhe në krahasim me Kinën komuniste, apo në Rusinë e ish Bashkimit Sovjetik?

Fatkeqësisht askund! Më sillet ndër mend Gustave Le Bon i famshëm që në vitet '30, se mos vetëm ai, thoshte me pezm se popujt që nuk janë përgatitur për ta bërë një ndryshim epokal, ndonjëherë në inat e sipër bëjnë hapa të mëdha dhe pastaj për disa vjet kthehen andej nga janë nisur!”

Fuga thotë se politika e ka kthyer ekonominë,  shtetërore si dikur por të veshur me emrin "ekonomi tregu".

Ai argumenton arsyet se pse ekonomia drejtohet nga “kupola e partisë”. Fuga shton më tej se duhet të kthehet ekonomia e tregut.

Ky i fundit thotë se votën do ia japë atij që realizon kthimin në ekonominë e tregut me reforma të thella strukturore .

“A nuk administrohen me PPP investimet më të mëdha kapitale në Shqipëri që prej nja dhjetë vjetësh? Shihni kush e drejton sipas ligjit politikën dhe operacionet konkrete të partneritetit gjoja privat me sektorin gjoja publik? Të gjithë janë jo vetëm ministra qeverie, por edhe të emëruar në organet drejtuese të partisë. Pra ekonominë e drejton kupola e partisë.  

Nuk ju mjafton kjo? Shihni se kush i bën tenderat dhe cilat janë prej dekadash procedurat e tenderimit që e telendisën Shqipërinë? I drejtojnë ministrat me sekretarët e tyre.

Shihni në zonën rurale ata që i quajnë gjoja fermerë! Janë thjesht bujq në masën 90 përqind të tyre, që jetojnë në ekonomi autarqike, jo tregu, pra ushqehen me prodhimet e tyre me rendimente qesharake që nuk i gjen as në ishujt shkëmborë të Greqisë.

Shihni ekonominë e tregut te dyaqenet e vogla të lagjeve, me dhjetra mijra, hahahaha, i quajnë biznese shumë të vegjël, me mikroskop mund t'i shohësh! Punojnë burri, gruaja, vjehrri i shkretë, nusja e dajës, kalamajtë dhe ndonjë komshi, pas banakut ku klientët e rrallë mezi lenë ndonjë lekë për ndonjë kg fasule a makarona që blejnë”, shkruan Fuga.