Dy vjet nga tërmeti i fuqishëm që goditi Shqipërinë dhe shkaktoi 51 viktima, qytetarët ende presin për një strehë

Dy vjet nga tërmeti i fuqishëm që goditi Shqipërinë në orët e para të mëngjesit. Tërmeti me magnitudë 6.4 të shkallës rihter shkaktoi 51 viktima dhe më shumë se 1 mijë të plagosur.

Edhe sot, pas dy vitesh dëmet e lëkundjeve të fuqishme nuk janë rikuperuar. Ende shumë familje janë në pritje të një strehe. Dëmet më të shumta ishin në qarkun e Durrësit, në epiqëndrën e tërmetit, por pasoja pati dhe në qarkun e Tiranës dhe Lezhës.

Lëkundjet e 26 nëntorit të vitit 2019 u ndjenë në pjesën më të madhe të vendit. Ai ishte tërmeti më i madh që kishte goditur Shqipërinë në më shumë se 40 vjet.

Deri në datën 1 dhjetor të atij viti ndodhën 1,300 pasgoditje, të cilat shkaktuan panik te qytetarët, frikë që i shoqëroi gjatë banorët e zonave të dëmtuara.

Shumë ndërtesa dhe pallate u shembën në Thumanë, Durrës, Laç e Tiranë, ndërsa gjendja e jashtëzakonshme për këto zona zgjati një muaj. 300 çadra emergjencash u ngritën pranë stadiumit të Durrësit dhe në Thumanë për të strehuar rreth 1,000 persona.

Më 30 nëntor kryeministri Rama deklaroi fundin e operacionit të kërkim-shpëtimit pasi nuk mendohej të kishte më trupa nën rrënoja.

E para që erdhi në ndihmë të shqiptarëve ishte Kosova. Shqiptarët atje strehuan shumë familje të prekura, ndërsa autoritetet kosovare ishin krah për krah me ato shqiptare.

Shumë shtete ndihmuan jo vetëm në operacionet e kërkim-shpëtimit, por dhe me ndihma financiare. Ndër to mund të përmendim Austrinë, Kroacinë, Francën, Greqinë, Emiriatet e Bashkuara, BE, etj.

Tërmeti i dy viteve të parë nxori në pah dhe mungesën që kishin autoritetet shqiptare në operacionet e kërkim-shpëtimit. Rrjedhimisht, ekipe shpëtimi me pajisje të specializuara, qen nuhatës dhe furnizime të tjera emergjencash mbërritën në Shqipëri nga vendet fqinje dhe Europa për të ndihmuar.

Shumë hotele hapën dyert për të pastrehët. Ata qëndruan për një peridhë kohë në këto ambiente, por thirrja e tyre ka qenë që shteti t'i ndihmojë në ndërtimin e shtëpive. Më shumë se 4,000 persona mbetën pa shtëpi, pas shkatërrimit të rreth 2 mijë ndërtesave.

Procesi i rindërtimit vijon prej dy vitesh, por nuk ka shkuar ashtu siç do të donin qytetarët. Ky proces është shoqëruar me akuza për vjedhje fondesh, mosmbajtje premtimesh e shumë të tjera.