Ekzekutimi i Gentjan Bejtjas, në vendngjarje u gjetën 50 gëzhoja plumbash kallashnikovi

Zbardhen detaje të reja nga atentati me armë zjarri i shënuar dje pasdite në Fushë Krujë ku mbeti i vrarë në vend me ish-polici i burgjeve, Gentjan Bejtja, një emër i njohur në botën e krimit.

Ngjarja e rëndë ndodhi në oborrin e shtëpisë së Bejtjas në fshatin Larushk dhe dyshohet se kanë qenë katër persona që kanë marrë pjesë në atentat.

Ata kishin mbërritur me automjetin tip ‘Land Rover’ fuoristradë rreth orës 16:20 minuta në rrugicën ku ndodhej vila e viktimës.

Mësohet se autorët e kanë gjetur portën e shtëpisë hapur, ndërsa të maskuar dhe me  kallashnikovë në duar kanë hyrë në banesë, ku Bejtja ndodhej vetëm disa metra larg, teksa merrej me punë shtëpie. Në këtë moment kanë qëlluar me breshëri plumbash në drejtim të tij duke e lënë të vdekur në vend dhe më pas janë larguar me shpejtësi.

Në vendin e ngjarjes policia ka gjetur rreth 50 gëzhoja kallashnikovi, që sipas të dhënave paraprake janë qëlluar nga 3 kallashnikovë.

Pas krimit, mbrëmë në afërsi të mbikalimit të Fushë Krujës vetëm disa kilometra larg vendit të ngjarjes kanë djegur makinën.

Nga hetimet, dyshohet se aty i ka pritur një tjetër automjet ku i ka larguar nga vendi.  

Kush ishte Gentian Bejtja, i përfshirë në vrasjen e komisar Lamajt

Gentian Bejtja, i cili u ekzekutua në banesën e tij në Fushë Krujë, është është një emër i njohur për policinë, me precedentë penalë të mëparshëm në fushën e veprave penale kundër personit dhe pronës, si dhe i arrestuar më parë me arsenal armësh në banesë.

Ai është hetuar edhe për vrasjen e kryekomisarit Dritan Lamaj, pasi u dyshua bashkë me Enver Stafukën, si një nga autorët e vjedhjes së makinës nga e cila u vra Lamaj, në shkurt 2013. Bejtja u bë i njohur me 26 shkurt të vitit 2013, një ditë pas vrasjes së kryekomisar Dritan Lamajt, në rrugën “Petro Korçari”, fare pranë banesës së tij.

Gentian Bejtja është shoqëruar më parë edhe për dy atentate, atë të vrasjes së Ilias Çalit në autostradën Tiranë-Durrës, në prill të 2022-it dhe atentatit ndaj Marklen Hakës në qershor 2022, por nuk u gjetën prova për ta fajësuar si autor të dyshuar.

Po ashtu, Gentian Bejtja përflitet se ka qenë i pranishëm në momentet e rrëmbimit të Enver Stafukës, më 8 shkurt 2015. Stafuka u rrëmbye në zonën e Fushë Krujës dhe u zhduk pa gjurmë prej atij momenti. Në vendin e ngjarjes, ishte edhe Durim Bami dhe Ramazan Rraja. Fati i Stafukës nuk u zbulua asnjëherë përgjatë kësaj dekade.