EMRI/ Drogë dhe armë pa leje, arrestohet i riu në Durrës, nën hetim bashkëpunëtori

Një 21-vjeçar është arrestuar nga Policia në Durrës dhe një 40-vjeçar është proceduar penalisht pasi akuzohen për trafik droge dhe armbëmbajtje pa leje. 

Blutë bëjnë me dije se në pranga ka rënë Sentiljano Selami, i cili është kapur duke drejtuar mjetin pa leje drejtimi, me pasagjer 40-vjeçarin Rr. K, në çantën e të cilit është gjetur dhe sekuestruan një thikë.

Më pas nga kontrollet e ushtruara në shtëpinë e Selamit, janë gjetur dhe sekuestruar 25 doza lëndë narkotike e dyshuar kokainë, 50 doza lëndë narkotike e dyshuar kanabis, 1 armë zjarri pistoletë me numër serie të pjesshëm (i fshirë pjesërisht), 100 fishekë luftarak të kalibrave të ndryshëm, 1 pasaportë biometrike në emër të një shtetasi tjetër dhe 3 telefona celularë.

Njoftimi i policisë:

DVP Durrës

Finalizohet operacioni policor i koduar “Mix”, për goditjen e shpërndarjes së lëndëve narkotike dhe armëmbajtjes pa leje.

Sekuestrohen kokainë, kanabis, armë zjarri, municion luftarak dhe dokumente të dyshuara të falsifikuara.

Arrestohet një 21-vjeçar, poseduesi i sendeve të kundraligjshme.

Procedohet penalisht një 40-vjeçar për mbajtje pa leje të armëve të ftohta.

Në vijim të punës për parandalimin, evidentimin dhe goditjen e veprimtarive kriminale, Seksioni për Hetimin e Narkotikëve në DVP Durrës, në bashkëpunim me Komisariatin e Policisë Durrës, finalizoi me sukses operacionin policor të koduar “Mix”.

Si rezultat i këtij operacioni u bë arrestimi në flagrancë i shtetasit S. S., 21 vjeç, banues në fshatin Kullë, Manzë, Durrës.

Si dhe u procedua penalisht në gjendje të lirë shtetasi Rr. K., 40 vjeç, banues në Kullë, për mbajtje pa leje të armëve të ftohta.

Operacioni u zhvillua mbi bazën e informacioneve të siguruara në rrugë operative, për një shtetas që dyshohej se shpërndante lëndë narkotike dhe mbante armë zjarri.

Gjatë kontrollit të ushtruar në automjetin me të cilin udhëtonte personi i dyshuar, në fshatin Kullë, rezultoi se shtetasi S. S. po drejtonte mjetin pa leje drejtimi;

Ndërsa në çantën e shtetasit Rr. K., shërbimet e Policisë gjetën dhe sekuestruan një mjet prerës (thikë).

Në vijim të operacionit, gjatë kontrollit të banesës së shtetasit  Sentiliano Selami, në fshatin Kullë, u gjetën dhe u sekuestruan në cilësinë e provës materiale:

25 doza lëndë narkotike e dyshuar kokainë, 50 doza lëndë narkotike e dyshuar kanabis, 1 armë zjarri pistoletë me numër serie të pjesshëm (i fshirë pjesërisht), 100 fishekë luftarak të kalibrave të ndryshëm, 1 pasaportë biometrike në emër të një shtetasi tjetër dhe 3 telefona celularë

Arma e zjarrit do të dërgohet për ekzaminim në Institutin e Policisë Shkencore, me qëllim verifikimin nëse është përdorur në ngjarje të mëparshme kriminale.

Materialet iu referuan Prokurorisë pranë Gjykatës së Juridiksionit të Përgjithshëm Durrës, për veprime të mëtejshme procedurale, për veprat penale “Prodhimi dhe shitja e narkotikëve”, “Mbajtja pa leje e armëve luftarake dhe municionit”, “Mbajtja pa të drejtë e armëve të ftohta”  dhe “Falsifikimi i dokumenteve”.