“Erdogan nuk bën më nëna”, Guri Rrokaj për Politiko: Pse i kushtova këngë presidentit tuk, burrit hijerëndë

Guri Rrokaj

Grupi iso-polifonik ‘Gjergj Arianiti Mallakastër’, i kryesuar nga Guri Rrokaj i ka dedikuar një këngë presidentit turk, Rexhep Taip Erdogan, si mirënjohje ndaj projektit që Turqia po asiston për ndërtimin e një spitali rajonal në Fier.

E publikuar pak ditë më parë, kënga ka marrë shumë shikime, por nga ana tjetër nuk kanë qenë të pakta edhe reagimet kritike.

Në një intervistë për Politiko.al, Guri Rrokaj tregon si lindi ideja për këtë këngë dhe se si i komenton ai reagimet negative ndaj këngës së grupit ‘Gjergj Arianiti Mallakastër’, që si për ironi mban emrin e një luftëtari të madh anti-osman.

Si lindi ideja për t’i kushtuar këngë presidentit turk?

Unë jetoj me situatën, por nuk bëj politikë. Dua të them se dy vjet më parë, ra tërmeti në 26 nëntor dhe qeveria turke u tregua e gatshme dhe dërgoi trupa për nxjerrjen nga rrënoja të viktimave dhe personave që mbetën të bllokuar.  

Premtoi se do bënte 500 shtëpi në Laç, dhe siç e kemi parë puna ka nisur. Kur shkoi Rama në Turqi pak javë më parë, Erdogan e thelloi dashamirësinë dhe premtoi se do bëjë spitalin me mbi 1 mijë shtretër ku përfiton e gjithë zona e jugut. I kam kënduar një burri të madh, hijerëndë, është miku jonë  dhe kam mirënjohje personale ndaj tij si artist.

Artisti i ka kënduar Stralinit, Mao Ce Dunit, Papa Gjon Palit. Unë jam në Shqipëri të lirë e demokratike dhe i këndoj kujt të dua. U këndoj patriotëve dhe burrave të mëdhenj, vetëm tradhtarëve nuk u këndoj.

A nuk është pak ironike fakti se grupi juaj quhet ‘Gjergj Arianiti’, pra mban emrin e një princi dhe luftëtari të madh anti-osman?

Jo, nuk është aspak ironike. Gjergj Arianiti ka qenë princ, vjehrri i Skënderbeut dhe ka luftuar kundra Turqisë. Kur e lexon turku që ky grup polifonik mban emrin ‘Gjergj Arianiti i Mallakastrës’, edhe ai i thërret mendjes.

Ne i këndojmë shtetit turk për ndihmat që në na ka ofruar në ditë të vështira dhe grupi i ka vënë “këmbën” hasmërive të vjetra.

Pronarët e tokës ku do të ndërtohet spitali në Fier po protestojnë, ndërsa ju i dedikoni këngë Erdogan-it...

Kjo është situatë tjetër, pasi fshatarit i dhimbset toka. Ata protestojnë për vlerën e lekut për pronat e tyre, por jo kundra turkut dhe projektit që po ndërtojnë ata.

Cilat kanë qenë reagimet që keni marrë deri tani? Në rrjetet sociale ka patur edhe komente negative.

Po, ka patur shumë fyerje, por unë nuk mërzitem sepse fyerjet i bëjnë ata që janë pa pune dhe kanë punë vetëm në celular. Harrojnë se në Turqi janë 5 milionë shqiptarë.

***

Vargjet e këngës

Lajmi bukur mori dhënë, në gjithë botën sot po zjenë

Erdogani tha me gojë, Shqipërinë do ta ndihmoj

Shteti turk dhe Ankaraja tregoi dashurinë e saj

Shqipërisë iu gjend pranë, porsi nëna për evlanë

Në Turqi tek gjysmëhëna, Erdogan nuk bën më nëna

Burri i besës që s’të fal, tha të bëhet një spital

Lacin po nge në themel me gjithë lagje krejt po del

Do bëjë spitalin në Fier për të gjithë vilajetin

Ky Rexhep Taip Erdogan Presidenti turk me famë,

Për Shqipërinë do mbesë ikonë, sa more sa malet të rrojë!

S.F/Politiko.al

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm