EuroNatur: Shqipëria po sakrifikon natyrën për turizmin masiv

Shqipëria do të jetë shteti i ftuar special në panairin e sivjetshëm të Tregtisë dhe Udhëtimeve (IBT Travel Trade Show) në Berlin në Mars 2025, ku të pranishëm në ceremoninë e hapjes do të jenë kryeministri Edi Rama dhe ministrja e Turizmit dhe Mjedisit, Mirela Kumbaro.

Fondacioni mjedisor gjerman EuroNatur ka theksuar se pavarësisht se Shqipëria është një vend që po tërheq gjithmonë e më shumë turistë me relievin e veçantë dhe bukuritë natyrore, shumë zona të cilat duhet të mbrohen në fakt po sakrifikohen për hir të turizmit.

“Shqipëria, e ftuara speciale për këtë vit në këtë panair, ka zgjedhur të fokusohet në turizmin masiv dhe turizmin e luksit, në vend që t’i kushtojë rëndësi ekoturizmit të qëndrueshëm”, shkruan deklarata e organizatës EuroNatur.

“Me shumë mundësi ata do të përmendin relievin e mahnitshëm shqiptar dhe pasuritë dhe trashëgimitë kulturore, por do të thonë edhe që Shqipëria është pionere e turizmit natyror”, vijon EuroNatur.

Dy vite më parë, në Mars 2023, qeveria shqiptare shpalli Vjosën dhe degët e saj Park Kombëtar, pas fushatave advokuese të organizatave mjedisore ndërkombëtare dhe vendase. Me gjithë angazhimin e premtuar, ky vendim sot vihet në pikëpyetje.

“Integriteti i këtij parku kombëtar është prekur”, shkruajnë aktivistët e EuroNatur, duke përmendur përpjekjet për të marrë ujin nga burimi i lumit Shushica, degë e Vjosës, për Ujësjellin e Himarës, si edhe punimet e Aeroportit të Vlorës që vijojnë në peisazhin e mbrojtur Nartë-Vjosë.

Aktivisti mjedisor Joni Vorpsi pohoi se neglizhimi i ligjeve kombëtare dhe ndërkombëtare, si edhe thirrjeve të Konventës së Bernës dhe komunitetit të shkencëtareve tregon se si fjalimet mbi natyrën dhe eko-turizmin në evente ndërkombëtare si panairi ITB janë thjesht një fasade për të mbuluar shkatërrimin e natyrës unike të Shqipërisë.

“Ndërtimi i Aeroportit Ndërkombëtar të Vlorës në zonën e mbrojtur Vjosë-Nartë është një shenjë e qartë se si qeveria shqiptare po menaxhon zonat e egra dhe të mbrojtura”, u shpreh Vorpsi nga organizata mjedisore PPNEA.

Së fundmi, qeveria shqiptare ka pajisur gjithashtu dhëndrin e presidentit Trump, Jared Kushner, me një licencë për të ndërtuar një resort luksoz në ishullin e paprekur të Sazanit.

“Të gjitha shenjat tregojnë se Edi Rama nuk shqetësohet për natyrën kur flet se do ta bëjë Shqipërinë një ‘kampione turizmi‘”, tha drejtori ekzekutiv i EuroNaur, Gabriel Schwaderer.

“Uji i lumenjve të egër po merret, ligatinat po i hapin rrugë aeroporteve, dhe shitja e bregdeteve të fundit të egër në vend ka filluar”, përfundoi Schwaderer nga EuroNatur. Reporter.al