Ambasadori i skandaleve, Fate Velaj prezanton librin, qeveria refuzon ta mbështesë

Një prezantim i librit që duhej të shërbente si deklaratë personale e ambasadorit të Shqipërisë në Austri, Fate Velaj, u shndërrua në një fiasko diplomatike, shkruan Extra24. Velaj prezantoi librin e tij të ri, “Kreuzweg” (Udhëkryq), në qendrën e refugjatëve në Traiskirchen – vendin ku ai vetë kishte kërkuar strehim si azilkërkues.

Megjithatë, Tirana nuk i dha asnjë mbështetje zyrtare. As kryeministri Edi Rama, as ministrja e Jashtme Elisa Spiropali, dhe as ministri i Kulturës Blendi Gonxhja, të cilët ishin njoftuar paraprakisht për ngjarjen, nuk morën pjesë. Mungesa e tyre u perceptua si një distancim i qartë nga figura e Velajt, i cilësuar në media si “ambasadori i skandalit”.

Plagjiatura dhe akuzat e tjera, në qendër të vëmendjes

Prezantimi i librit ndodhi në një kohë kur Velaj po përballet me akuza të reja për plagjiaturë. Kritikat ndaj Kreuzweg sugjerojnë se libri përmban elementë të njëjtë me tezën e tij të masterit, e cila është çmontuar më parë nga eksperti i plagjiaturës, Dr. Weber.

Opozita shqiptare, e udhëhequr nga kreu i PD Sali Berisha, deklaroi se karriera diplomatike e Velajt mund të rishikohet, duke theksuar se ai ka “prodhuar shumë skandale në një kohë shumë të shkurtër”. Lista e akuzave përfshin:

Dyshimin për blerje të diplomës universitare nga Universiteti Kristal;

Plagjiaturë të tezës së masterit në Austri;

Mbrojtjen e kunatës së tij të akuzuar penalisht gjatë shërbimit në ambasadën e Vjenës;

Marrjen e përfitimeve të mirëqenies sociale në Austri, pavarësisht deklarimit të pasurisë prej 1.7 milion eurosh në parlamentin shqiptar.

Hetim nga SPAK

Mediet raportojnë se Prokuroria Speciale Kundër Korrupsionit dhe Krimit të Organizuar (SPAK) po shqyrton mundësinë e ndërmarrjes së veprimeve të mëtejshme kundër Velajt.

Prezantimi i librit, që duhej të ishte një ngjarje personale dhe kulturore, u shndërrua kështu në simbol të besueshmërisë së dëmtuar të ambasadorit dhe, ndoshta, fillimi i fundit të karrierës së tij diplomatike.