"Fëmijët shqiptarë të rrezikuar", CRCA /ECPAT: Dështimi i qeverisë ka nxitur trafikimin; çfarë thuhet në raport

Në Ditën Ndërkombëtare kundër Trafikimit të Qënieve Njerëzore, CRCA/ ECPAT Shqipëri ka ngritur shqetësimin se dështimet e qeverisë dhe komunitetit ndërkombëtar kanë nxitur trafikimin e fëmijëve dhe qenieve njerëzore nga Shqipëria drejt vendeve perëndimore.

Pavarësisht se mbështetja nga ndërkombëtarët ka nisur që prej vitit 2001 dhe zbatuar një sërë masash dhe programesh për parandalimin e trafikimit të qenieve njerëzore, trafikimi i fëmijëve nga Shqipëria, vazhdon të ndodhë pa u sfiduar nga asgjë.

Raporti mbi Trafikimin e Qënieve Njerëzore të Departamentit Amerikan i vitit 2021, nënvizon se “Trafikantët e qenieve njerëzore shfrytëzojnë viktimat vendase dhe të huaja në Shqipëri, dhe zakonisht i detyrojnë fëmijët të lypin ose të kryejnë lloje të tjera të punës së detyruar, të tilla si shitja e sendeve të vogla.

Trafikantët shfrytëzojnë fëmijët shqiptarë, kryesisht nga komuniteti rom dhe ballkano-egjiptian, për punë sezonale dhe lypje të detyruar. Nga ana tjetër trafikantët shfrytëzojnë fëmijët përmes punës së detyruar në fushat e kanabisit në Shqipëri, dhe disa trafikantë ka të ngjarë të jenë të përfshirë në trafikun e drogës.”

Ndërsa raporti i fundit i ECPAT International dhe ECPAT Shqipëri, evidentoi se përgjatë vitit 2019-2020, Shqipëria renditej në vendin e parë për numrin e fëmijëve të pashoqëruar në Itali, me rreth 1393 fëmijë e të mitur.

Ministria e Brendshme britanike raportoi se të paktën 162 fëmijë nga Shqipëria u shfrytëzuan për qëllime seksuale, për vepra penale dhe punë të detyrueshme në vitin 2020.

Tre ditë më parë Eurostat raportoi se 12% e fëmijëve që kanë kërkuar azil për herë të parë në një vend të Bashkimit Europian vinin nga Shqipëria, ose ndryshe 5055 fëmijë nën 18 vjec gjatë vitit 2020. Të gjithë këta fëmijë janë të rrezikuar nga trafikimi dhe shfrytëzimi.

Të njëjtin shqetësim e përcjell edhe raporti i EUROPOL, që tregon se këtë vit është rritur ndjeshëm trafikimi i fëmijëve nëpërmjet internetit. Varfëria, mungesa e shpresës, situata politike, përfshi edhe pandeminë, kanë sjellë një shtim të risqeve për trafikimin dhe shfrytëzimin e fëmijëve nga Shqipëria, argumentohet në raportin e ECPAT.

Nisur nga kjo situatë, CRCA/ECPAT i parashton disa kërkesa qeverisë shqiptare:

- Krijimin e një programi kombëtar të eleminimit të varfërisë së fëmijëve, duke e kthyer këtë çështje në thelbësore për qeverinë e re që do të formohet në Shtator 2021;

- Ngritjen e një task-force në nivel kombëtar dhe vendor për eleminimin e trafikimit dhe shfrytëzimit seksual të fëmijëve;

- Krijimin e një Fondi Kombëtar për Fëmijët, për të financuar ushqimin dhe shërbimet falas për të gjithë fëmijët që jetojnë nën minimunim jetik të varfërisë në Shqipëri.

- Ne nxisim qeverinë e Shqipërisë si dhe të gjithë deputetet në Kuvendin e ri, që ta kthejnë çështjen e eleminimit të varfërisë së fëmijëve në qendër të të gjitha ndërhyrjeve për katër vitet e ardhshme, duke i kthyer shpresën të gjithë fëmijëve e adoleshentëve, të cilët mendojnë se Shqipëria nuk është një vend miqësor për fëmijët!